Solenidade ne’ebé ohin ita selebra la’ós konvite ida atu desifra mistériu ne’ebé subar iha “Maromak ida iha ema na’in tolu”; maibé konvite atu kontempla Maromak ne’ebé domin, katak família, ne’ebé komunidade no hakiak ema sira atu halo sira komunga iha mistériu domin nian ida-ne’e.

Iha leitura dahuluk, Jahwéh revela an nu’udar Maromak relasaun nian, ho empeñu atu estabelese komuñaun no familiaridade no nia Povu. Nia mak Maromak ida ne’ebé mai hasoru ema sira, ko’alia ba sira, hatudu dalan seguru ba liberdade no moris nian ba sira, nafatin atentu ba ema sira nia problema sira, intervein iha mundu atu liberta ita husi buat hotu ne’ebé oprime ita no atu oferese perspetiva sira moris nakonu no lialoos nian.

Leitura daruak konfirma mensajen ida dahuluk nian: Maromak iha ne’ebé ita fiar bá la’ós Maromak ida dook no labele asesu bá, ne’ebé demite husi nia papél Kriadór nian no asiste ho  indiferensa no impasibilidade ema sira nia drama sira; maibé nia Maromak ida ne’ebé akompaña ho paixaun umanidade nia dalan no la deziste atu oferese moris nakonu no definitivu ba ema sira.

Iha Evanjellu, Jezús hatudu katak atu sai nia dixípulu presiza aseita ninia konvite atu kesi an ho komunidade Aman, Oan no Espíritu Santu nian. Jezús nia dixípulu sira simu enviu atu fó sasin ba ninia proposta moris nian iha mundu nia leet no simu mandatu atu aprezenta, ba mane no feto hotu, lahó esesaun, Maromak nia konvite atu integra iha komunidade trinitária.

Download