Papa Francisco estabelese festa mariana foun: Maria Kreda nia Inan
Roma – Papa Francisco ne’ebé iha devosaun boot ba Na’i-Feto, estabelese festa foun ba Kreda Katólika ho naran “Maria Kreda nia Inan” ka iha lia-latin “Mater Ecclesia”, ne’ebé atu selebra iha loron segunda tuir kedas Pentekostes.
Desizaun ne’e fó sai ho dekretu ida husi Kongregasaun ba Kultu Divinu no Dixiplina Sakramentu sira nian. Dekretu ne’e hateten katak venerasaun ba Maria Kreda nia Inan iha abut antigu liu iha Tradisaun katólika, to’o iha tempu S. Agostinho nian no s. Leão Magno. Títulu ida-ne’e, iha nia abut iha Testamentu Foun ninia haktuir kona-ba Maria.
“Nia sai Kreda nia Inan doben ne’ebé Kristu iha krús halo moris, bainhira husik ninia Espíritu”, dekretu hateten. “Kristu, liuhusi dixípulu ne’ebé Nia hadomi, foti dixípulu hotu nu’udar ministru sira ninia domin nian ba Inan, hodi entrega nia ba sira atu nune’e sira bele simu nia ho domino an nian”.
Iha 1964, bainhira taka Konsíliu Vaticanao II (1962-65), Beatu Papa Paulo VI ho modu ofisiál deklara Maria nu’udar “Kreda nia Inan”, no konvida Katóliku sira atu invoka Maria ho títulu ida-ne’e.
Durante tinan jubilár 1975, Vaticano prodús Missa espesiál ida, hanaran “Missa votiva” ba Maria ho títulu “Beata Maria Ecclesiæ Matre” no aprova mós atu hatama títulu ne’e iha orasaun oioin ba Maria.
Ho dekretu ida-ne’e, devosaun ba Maria Kreda nia Inan sai memória obrigatória ba Kreda universál.
“Hodi konsidera atentamente oinsá promosaun devosaun ne’e nian bele favorese kreximentu sensu maternu Kreda iha Bibi-Atan sira, iha relijiozu/a sira no iha sarani sira, nu’udar piedade mariana jenuina ida mós, Papa Francisco estabelese katak memória beata Virjen Maria, Kreda nia Inan, hatama iha Kalendáriu Romanu iha Segunda depoizde Pentekostes no selebra nia tinan-tinan.
Selebrasaun ida-ne’e sei tulun ita atu hanoin katak vida sarani, atu buras, presiza tau ánkora iha Krús, iha Kristu nia saran an iha meza eukarístika, iha Virjen ne’ebé oferese an, Makso’ik nia Inan no sira ne’ebé hetan makso’in sira nia Inan”.
Dekretu nia data mak 11 Fevereiru, loron komemora Na’i-Feto Lourdes nian.
