Baucau – Nu’udar Kreda ita ho konxiente no hatene katak ohin solenidade Pentekoste nian. Ita fó Parabens ba Kreda Universal tanba ohin ita bele dehan katak aniversariu Kreda nia moris nian. Maromak Nia liafuan sira konvida ita sarani ida-ida atu fiar iha Na’i Nia Espiritu, Nia ne’ebé fó moris.

Maske liturjikamente ami selebra Pentekoste  nian no leitura sira hothotu husi pentekosta nian, maske nune’e ami nia komunidade Sta Teresa d’Avila, ami selebra hotu hamutuk ho festa madre Mazzarelo nian iha loron lokraik. Iha Festa ne’e ami mós konvida familia saleziana tomak hanesan komunidade edukativa, ADMA, SDB no oratorianu no aman inan sira hotu partesipa iha festa Madre Mazzarello nian ne’e.

Festa ne’e hala’o hanesan ne’e: hahú ho Santa Misa, selebra husi Pe.Agnelo Jeronimu SDB. Misa hotu tihan Ir. Sanzinha aprezenta Madre Mazzarello nia moris liuhusi prezentasaun Power point no film badak kona-ba Madre Mazzarello nia moris. Hotu tiha film Madre Mazzarello nian. Iha festa ne’e sai furak liu tanba familia saleziana sira no oratorianu sira nia aman inan kontribui aihan, ida-ida lori buat ruma hafoin ami tau hamutuk hodi han hamutuk. Nune’e hoti tiha santa Misa, iha mós fraternizasaun ka han hamutuk hafoin sira ne’ebé dook ba uma kedas no sira ne’ebé besik halo dahur “dansa” hamutuk kuase minuto 30 nia laran hafoin ida-idak fila ba sira nia uma ho ksolok. Wainhira familia sira fila tiha, husi komunidade SDB sira mós mai partesipa festa nune’e iha kalan ami han hamutuk ho sira. Hodi intensaun hodi halibur hamutuk SDB no FMA nian ne’e atu haburas Espiritu familia nian no liuliu atu familia saleziana koñese liután Madre Mazzarello.

 

(Lucia Pereira)