Venilale – Ohin, 20 de Maio 2018 mak loron grasa nian ba Oratorio Lia-Oli tanba madre Provinsial Me. Alma ba vizita ami nia Oratoriu. Me. Alma no Me. Cecilia to´o iha oratoriu tuku 15:30 wainhira to´o iha ne´ebá ami simu Madre ho knananuk ida, no ami lori Madre ba iha kapela atu halo orasaun, depois de orasaun ami aprezenta ba Madre ami nia atividades ne´ebé ami hala´o ona iha oratoriu, no depois de aprezentasaun ami husu ba Madre atu hato´o liafuan ruma ba Oratorianu  sira. Madre dehan: “se mak hatene uluk kapela ne´e oinsa? sira balun hatan dehan uma ne´e uluk  halo ho du´ut deit no iha deit kruz iha laran, agora mak sai furak tanba ama no apa mak halo foun. Madre admira ba kapela ne´e tanba furak no kapas, madre mos foin primeira vez tama iha kapela ne´e  Nune´e madre dehan  aproveita didi´ak aktividade sira ne´ebé imi hala´o ona iha oratoriu  no se imi aprende didi´ak imi sei sai furak hanesan imi nia kapela ne´´ebe furak. No ida tan, imi rasik dehan Jesus iha kapela laran, entaun imi tenke badinas atu mai vizita Nia, ko´alia ho Nia, Nia sei rona imi. De pois de Madre koalia,  iha mos kolaborador ida husi Lia – Oli ne´ebe hato´o ninia liafuan agradesimentu nian ba madre nia prezensa, no nia husu atu oratoriu ne´e kontinua la´o ba oin no keta para iha dalan. Depois de ida ne´e labarik sira agradese madre ho kantu ida no dansa ida, hotu tiha madre fahe rebusadu. Depois ami husu madre atu husu Maromak nia bensaun ba aihan ne´ebe oratoriu nia inan aman prepara ona, ami merenda hamutuk depois fahe malu. Obrigada Me. Alma ate tinan oin.

(Domingas Pereira)