Laga – Tuir programa Inspetoriál 2018 ne’ebé mak trasa tiha ona, ita hakarak atu komunidade edukativa tomak hatene kona-ba estreia Reitór-Mor nian ho tema: Rona, dixernimentu no akompañamentu. Maibé ami, ekipa inter-ámbitu nian deside  atu hakle’an de’it tema kona-ba “rona”. Nune’e, iha 19 Maiu 2018, ami ekipa inter-ámbitu hala’o formasaunba leigu sira, hola parte iha komunidade edukativa.

Iha enkontru ne’e Me. Cecilia del Mundo nu’udar oradora hakle’an hamutuk ho partisipante sira kona-ba tema rona nian.

Enkontru ne’e hala’o iha komunidade FMA, komunidade Laura Vicuña iha Laga, maské komunidade edukativa ladún barak, hamutuk ema na’in 18 de’it maibé sira partisipa ho di’ak. Iha enkontru ne’e fó tempu ba sira hodi reflete no fahe sira-nia esperiénsia sira iha grupu laran hafoin sira hato’o fila fali ba asembleia atu hato’o rezultadu reflesaun nian. Iha sira-nia aprezentasaun grupu nian, sira mós deskobre iha sira-nia moris no sira-nia esperiénsia sira katak, iha dezafiu boot kona-ba rona. Sira hetan sira-nia an katak sira lahatene rona, sira gosta liu ko’alia duké rona, sira hakarak rezolve problema de’it maibé lakohi rona problema, sira koñese tiha ona ema nia hanoin molok ema fó sai nia hanoin. Iha sínteze sira dehan: tanba ami senti ami mak aman-inan, ami mak profesór boot liu foin-sa’e sira, entaun buat ne’ebé sira ko’alia ami la konsidera, nune’e hamosu taka an. Iha moris loroloron nu’udar edukadór/a  iha ANTIPATIA BARAK DUKÉ EMPATIA.

Iha enkontru ne’e partisipante sira mós haksolok liu tanba madre Provinsiál TIN nian, Me. Alma Castagna mós tuir enkontru ne’e. Nune’e iha ikus molok remata enkontru ne’e, nia hato’o liafuan ruma ba partisipante sira hodi dehan ba sira atu hatutan no habelar saida mak sira simu ona ohin. Depois nia dehan tan: “Jezús dehan, ida ne’ebé simu barak sei husu barak husi nia”. Hafoin nia fó TPC ba sira ida-ida atu halo iha uma, iha eskola no iha komunidade.

Agradese ba ekipa nia haka’as an hodi hatán ba nesesidade edukasaun ohin loron nian liuhusi hahalok rona nian.

(Lucia Pereira)