Kapítulu Inspetoriál FMA TIN (27Outubru – 1 Novembru 2013)

 

Dili – Kapítulu provinsiál to’o ona nia rohan. Partilla sira lori ba kompromisu boot liután atu hafoun moris iha karizma nia roman, hodi moris fidelidade kriativa tuir ezijénsia mai husi kontestu ohin nian. Maibé atu “sai uma ne’ebé evanjeliza”, uluknanai FMA ida-idak, ajente pastorál ida-idak, sarani ida-idak presiza “sai uma ne’ebé evanjeliza an rasik”, kontinua prosesu sira konversaun nian iha nivel pesoál, iha relasaun sira no iha moris misaun nian.

FMA sira-nia Konstituisaun mak programa moris nian ba sira ida-idak. Iha nia laran iha indikasaun sira kona-ba meiu hotu ne’ebé tradisaun saleziana oferese. Espiritu família kbi’it kriativu sulin husi Don Bosco nia fuan tenke karakteriza ita-nia komunidade ida-idak no husu atu ita ida-idak halo ita nia parte (kf Konst. 50). Madre Rosetta hateten beibeik katak artigu 50 Konstituisaun FMA nian mak núkleu Konstituisaun nian. Se ita moris ida-ne’e ita-nia relasaun sira sei sai umana no evanjélika liután.

Ita presiza sai husi an rasik atu bá iha periferia sira moris nian no se apostoladu ezije ita modifka ritmu moris komunidade nian, hodi sai uma ne’ebé nakloke no fleksivel ba misaun. Iha diskusaun sira salienta katak se ita hafoun no hamanas iha ita “fuan oratorianu” ita kriativa liután iha ita-nia misaun! Hanesan haktuir iha Sínodu Bispu sira nian (2012) dezafiu sira mai husi mundu kontemporáneu ne’ebé kontinua muda, hanesan dezafiu sosiu-kulturál no polítiku, ekonómiku, sientífiku, media komunikasaun nian sadik ita atu hafoun evanjelizasaun iha ninia modalidade sira. Hodi hakle’an no moris tuir Sistema Preventivu nu’udar ita-nia espiritualidade no métodu edukativu ita bele fó resposta adekuada ho modalidade foun ba emerjénsia edukativa sira iha ita-nia tempu.

Ita la servisu mesak! Atu bele sai efetivu iha misaun edukativa-evanjelizadora ita tenke la’o hamutuk ho Kreda lokál no iha kolaborasaun ho komunidade edukativa no Família Saleziana nia laran nune’e mós, iha rede ho instituisaun governamentál no ONG.

Nu’udar Maria nia oan-feto sira, FMA sira habiit sira-nia “filiasaun mariana”, hodi aprende iha ninia eskola atu sai Jezús nia dixípula no misionária/apóstola.

Kapítulu provinsiál remata ona iha loron 1 Novembru ho votasaun sira no selebrasaun eukarístika soleniandade santu sira nian ne’ebé D. Rodrigo Bilbao mak prezide. Delegada ba Kapítulu Jerál mak irmán Jacinta Gusmão no nu’udar suplente irmán Alma Castagna. Dokumentu sira hetan votu unánime.

Oras-ne’e entrega fali ba komunidade FMA sira no FMA ida-idak atu asume ho barani dalan konversaun sira no la’o tuir dalan santidade hanesan ita-nia fundadór S. Giovanni Bosco no Santa Maria D. Mazzarello halo, nune’e mós santu sira ita-nia Família Saleziana nian no santu sira ne’ebé oras-ne’e haksolok ona iha Reinu Lalehan.