Venilale – Estudante sira ETV, S. Maria Mazzarello nian husi primeiro to’o segundo ano, iha atividade estra-kurrikulár ohin, 19 Maiu, haree filme “Boychoir” ho objetivu atu aprende oinsá iha “ensinu-apprendizajen” importante tebes fatór akompañamentu, husi parte edukadór/a sira-nian no mós husi parte kolega sira-nian.

Rezulltadu husi partilla

Depoizde haree “Boychoir” estudante sira fahe ba grupu tuir asosiasaun no buka hatán ba pergunta kona-ba “karakterístika sira mestre di’ak no kolega eskola di’ak ne’ebé tulun ‘Stet’ atu haburas nia talentu”.

Iha-ne’e grupu sira evidensia katak edukadór/a presiza koñese alunu/a nia situasaun, ninia potensialidade no motiva alunu/a ba susesu. Ezemplu iha-ne’e ita haree diretora eskola Odessa nian, Patricia Steele no mestre foin-sa’e Wooly husi American Boychoir School. Maski  mestre Carvelle, aprezenta karakterístika edukadór ida rigorozu no dixiplináriu tebes, nia mós hatudu oinsá edukadór ida influensia ninia alunu hodi fó afetu, apoiu no rekoñesimentu ba dezempeñu ne’ebé fó. Atitude mestre Carvelle nian sai fatór xave atu Stet, ho tempu manán auto-estima hodi iha konfiansa liután iha nia an rasik no finalmente halo nia hasai ninia aptidaun muzikál nu’udar korista di’ak. Ita mós bele apresia diretora eskola (Kathy Bates) ne’ebé hatudu satisfasaun no ksolok loloos bainhira haree rezultadu di’ak husi alunu ninia haka’as an.

Kolega eskola ne’ebé estudente sira identifika nu’udar tulun ba Stet mak Fernando. Hodi belun foun ki’ik-oan ida nia tulun, iha ambiente kompetitivu ida nia laran, Stet neineik-neineik hahú hadi’ak ninia progresu iha kantu ne’ebé mestre sira mós nota, nune’e hatudu katak nia mós bele.

Film ne’e mós konsege salienta ambiente muzikál ne’ebé kompetitivu demais, iha-ne’ebé kantu sai uluknanai ezersísiu ida atu emerje duké meiu ida atu kria armonia (ezemplu kompetisaun entre Stet no Devon atu sai solista).

Buat ne’ebé lori ba reflesaun mak presiza deskobre no kultiva ita-nia talentu rasik no ida fali mak atu to’o ba afirmasaun an raisk nian ka autorealizasaun presiza empeñu no sakrifísiu. Filme ne’e fó esperansa no afirma hikas Don Bosco nia konviksaun katak iha foin-sa’e ida-idak maski nakar oinsá karik bá, iha pontu pozitivu, ne’ebé se ita deskobre, bele halo nia vibra ho nota exelente.