Sidade Vaticana – Papa Francisco taka siklu katekeze kona-ba Batizmu iha Audiénsia Jerál 16 Maiu ho tema “hatais Kristu”.

Efeitu espirituál sakramentu ne’e nian, bele haree ho entrega hatais mutin no lilin lakan. Ne’e mak sinál vizivel ne’ebé manifesta batizadu sira nia dignidade no nnia vokasaun sarani.

Hatais karidade nian

Hatais mutin haklaken kondisaun transfigura an nian iha glória divina. Símbolu grasa nian ida-ne’e, mak halo ema sarani kriatura foun, hatais Kristu. S. Paulo fó hanoin katak hatais Kristu katak hatais sentimentu sira ternura nian, bondade nian, umildade nian, laran-maus nian, magnanimidade nian, perdaun nian, no liuliu, karidade nian.

Halakan fuan

Iha mós simbolizmu lilin nia lakan nian, ne’ebé fó hanoin kona-ba Kristu nia roman ne’ebé manán aat nia nakukun. Síriu paskál nia lakan halakan sarani sira nia fuan, hodi hakonu ho roman no manas. Husi kedas tempu antigu, sakramentu Batizmu iha naran mós nu’udar “iluminasaun” no ema ne’ebé foin simu batizmuu hanaran “iluminadu”.

Edukasaun sarani mak direitu ida labarik sira-nian

Defaktu, ida-ne’e mak vokasaun sarani: la’o nafatin nu’udar oan roman nian, hodi persevera iha fiar.. Se sei labarik, inan-aman no aman/inan sarani sira mak iha knaar atu haboot grasa batizmu nian. “Edukasaun sarani mak direitu ida labarik sira-nian”, Papa Francisco repete dala rua, hodi sita Ritu Batizmu nian.

“Presiza proteje, defende,no haluan iha ita Kristu nia prezensa moris nian, ahi-oan ne’ebé ilumina ita-nia ain-hakat sira, roman ne’ebé orienta ita-nia hilin sira, ahi-lakan ne’ebé hamanas fuan sira atu bá hasoru Na’i, hodi halo ita iha kbiit atu tulun ema ne’ebé la’o ho ita, to’o iha komuñaun haketak-laek ho Nia”.

Gaudete et Exsultate

Iha katekeze Batizmu nia rohan, Amu-Papa repete ba sarani ida-idak konvite ne’ebé nia halo iha Ezortasaun apostólika Gaudete et Exsultate:

“Husik atu grasa ó-nia Batizmu nian fó fuan iha dalan santidade. Husik atu buat hotu nakloke ba Maromak no, ba ne’e, hili Maromak hodi la para. Keta dezanima, tanba nia iha kbiit Espíritu Santu nian atu halo santidade sai posivel, ne’e mak Espíritu Santu nia fuan iha ó-nia moris”.