Kapítulu Inspetoriál FMA TIN (27Outubru – 1 Novembru 2013)

Dili – Loron dahaat no dalimak kapítulu provinsiál nian lori irmán sira atu diskute kona-ba oinsá “sai uma ne’ebé evanjeliza” no prosesu transformasaun vitál ne’ebé Institutu husu liuhusi estudu dokumentu própriu Institutu nian no pobreza.

Hafoin grupu komisaun kompostu husi irmán Ermelinda Gomes, irmán Alma Castagna, irmán Olga Belo, irmán Luz Stella Ruiz, irmán Sebastiana Soares, irmán Jacinta Gusmão no irmán Alexandrina Pinto, konsege halo sínteze husi resposta hotu ba kontribuisaun sira husi grupu oioin, inklui grupu ida leigu sira-nian.

Bele haree partisipasaun ativa iha diskusaun sira iha grupu ki’ik, nune’e mós iha asembleia. Durante partilla kona-ba pergunta “Oinsá sai uma ne’ebé evanjeliza”, leigu sira observa pontu ruma hanesan tuirmai ne’e:

• Foin-sa’e sira la mai ona iha oratóriu no tama iha grupu seluk hanesan labarik ba Kristu, joven ba Kristu, tanba grupu sira-ne’e hala’o atividade ne’ebé dada liu joven sira (ezemplu: konvíviu, paseiu fulan-fulan, camping, kongresu…); tan ne’e presiza sai kriativu liután, buka loke grupu ki’ik iha oratóriu atu foin-sa’e sira hili tuir interese no livre atu partisipa.
• Sasin di’ak husi komunidade no irmán sira-nian kona-ba espíritu família nian sei la hamta’uk no hadook foin-sa’e husi ita-nia ambiente.
• Hadi’ak ita-nia evanjelizasaun hodi hakbesik ema ida-idak no to’o iha família sira atu hato’o Maromak nia Liafuan atu bele eduka ba fiar nune’e hatene halo diferensa entre fiar tradisionál no fiar katólika;
• Foin-sa’e no família sira la valoriza ita-nia oratóriu no mai de’it se hetan buat materiál ruma, maski komunidade sira ba to’o iha bairru, nune’e buka atu fó motivasaun di’ak liután ba sira no laran-manas apostóliku no kriatividade boot liután.
• Halo animadór sira sai ativu no partisipa liután iha misaun, fó fiar atu kaer grupu ki’ik, hala’o vizita família ho ema moras, kiak, nst.

Aleinde ne’e, leigu sira destaka kondisaun ruma atu evanjeliza ne’ebé presiza hadi’ak:

• Kria ambiente família nian;
• Estilu relasaun tuir espíritu família nian, hakbesik no akompaña joven sira ne’ebé hadook an husi ita hodi hatudu interese ba sira nune’e sira bele sente ema tau matan ba sira hodi tulun sira se karik hetan problema no difikuldade;
• Fó kontinuidade formasaun no akompañamentu ba animadór/a, antiga/u aluna/u sira ne’ebé muda ba fatin seluk dook husi ambiente salezianu husi família no edukadora saleziana sira.
• Presiza pasiensia boot  ho foin-sa’e sira, sakrifika an atu lori ba oin akompañamentu, maski iha situasaun susar no tenke sai prudente.

Ita hein atu kapítulu provinsiál ne’e bele lori transformasaun pesoál ba FMA ho nia komunidade edukativa ida-idak no laran-manas da mihi animas boot liután ba misaun edukativa-evanjelizadora ne’ebé Maromak entrega ba sira.