Dili – Vizita  kanónika husi Madre Provinsiál Madre Alma Castagna, FMA, iha komunidade Eusebia Palomino, halao durante loron  neen nia laran hahu husi loron 07-12, fulan Maiu tinan 2018. Programa durante vizita ne’e, iha ajenda mós atu hasoru estudante sira husi pre-Escolar too III ciclo, inklui mós trabalhadóres, Aman Inan no professores sira. Ba loron dahuluk madre nia vizita ba estudante sira, husi III Ciclo, estudante sira simu madre ho ksolok no entusiasmo, sira espresa sira nia ksolok simu nian liu husi Kanta Benvenuta no dansa “ I will Follow  You”, hafoin sira nia aprezentasaun madre fo buongiorno no kontinua eskola normal. Loron daruak nian madre vizita mós  estudante Pre-Eskolar no estudante I & II Ciclo, uluknanain mak simu husi estudante kiik sira/TK, nu’udar sira nia bemvinda, hato’o liu husi kanta hafoin akompaña madre too iha gym no kontinua simu husi estudante I & II ciclo, hodi tara tais no aprezenta sira nia kanta no dansa  ba Madre provinsiál, ho tempu hanesan madre hato’o buongiorno ba estudante sira, iha madre nia buongiorno madre hateten katak: “  Parabens ba imi ne’ebé uza lingua oioin atu komprimenta madre, hatene lian  oioin mak  fasilita  imi atu komunika ho ema hotu, aleinde liafuan badak ne’e madre konta mós ba estudante sira Madre Mazzarello nia istoria: wainhira sei kiik MM gosta han keju, loron ida wainhira ni mama ba tiha merkadu MM foti tiha keju ne’ebé mama rai iha ,meja leten no wainhira mama fila husi merkadu Maria Mazzarello bosok no dehan busa mak han tiha mama nia keju, husi istoria ne’e madre relata katak MM iha defeitu uluknanain mak kanten, ho nia kanten halo nia sai bosokten, nune’e ba imi hotu mós iha defeitu, maibé wainhira imi lahakas-an atu koriji defeitu ida, entaun defeitu ida tutan tan defeitu seluk tan. MM iha defeitu maibé husi kiik hakas-an, koriji, nune’e wainhira boot sai modelu di’ak no sai santa. Hanesan mós Amu-Papa nia mensajen katak: atu sai santu imi haksolok no hahi Maromak, halo imi nia dever ho di’ak, ( Don Bosco dehan mós ba Domingos Savio), nune’e madre dezafia estudante sira, imi hakarak sai ema boot, di’ak, konhesidu, agora komesa estuda didi’ak,  dixiplina-an tuir tempu, reza didi’ak, halimar didi’ak, obedese didi’ak, ida ne’e sai imi nia programa moris loron-loron nian, se halo tuir didi’ak aban bairua imi sai boot sei sai ema ne’ebé di’ak no iha kualidade. Iha dia 10, fulan Maiu hamutuk ho madre provinsiál, professores, estudante, KE, selebra festa Madre Mazzarello no agradese ba Madre Alma. Iha okaziaun ida ne’e padre Agostinho Soares, SDB mak nu’udar selebrante ba Eukaristia. Selebrasaun Eukaristia halao deit iha Gym eskola nian, alunos sira ne’ebé partisipa mak husi V ano too IX ano, durante missa iha Padre nia omilia nia haktuir kona ba leitura festa ne’e nian ko’alia kona ba “Domin”: nune’e padre dehan katak; domin ne’ebé loos la haree ba ema, ita koñese ka lae, maibé depende ba ema ne’ebé ita hasoru, domin tenke lao iha liña orizontal no vertikal, domin ba Maromak deit la to’o, presiza hatudu iha ita nia maluk sira, domin ba Maromak mak badinas reza, ba missa, halo sakrifisiu no domin ba maluk sira mak, tulun malu, ko’alia liafuan di’ak ba malu, la baku malu, nune’e MM ohin konvida ita atu hadomi Maromak ho Maluk sira, loas familia deit maibé naran ema ne’ebé ita hasoru. Depois missa remata alunos sira  hato’o sira nia agradese ba madre Alma liu husi kanta no dansa, hafoin madre fahe buat ruma midar ba alunos sira.  Ho tempu hanesan iha mós enkontru ho professores no nukleu animadór Komunidade Edukativa. Iha enkontru ida ne’e ko’alia kona ba programasaun Komunidade Edukativa nian,   haree filme badak  ne’ebé edukadór sira halo iha Afrika,  iha elementu esensiál  tolu husi filme ne’e:  haree (see), sente  buat ruma, ikus imajina no halao buat ruma. Aleinde enkontru iha mós Animadór KE balun ne’ebé husu perguntas: “Relasiona ho situasaun ne’ebé agora ita hasoru, joven barak mak hadook –an husi igreja, liu-liu iha ami nia bairu madre sira ba loke tan oratorio iha ne’eba, konvida sira mós la partisipa, nune’e madre Alma hatan katak “ presiza halo aprosimasaun pessoal  joven sira,  pasiénsia no nafatin hakbesik husu sira nia hakarak saida”. Iha professores barak ne’ebé hein hodi husu perguntas oioin ba madre realsiona ho sira nia knaar nu’udar edukadór.

Iha loron tuir fali, loron 11 Maiu 2018, iha enkontru ho aman inan estudante sira nian, hala’o iha Gym iha tuku 09.00 too tuku 12.00.Otl, ba dahuluk , hahu ho orasaun no liafuan bemvinda husi diretora da eskola Ir. Paulina, FMA, hafoin madre Alma kontinua kedas ho nia lia menon, pontu importante tolu ne’ebé madre hameno ba aman inan sira mak; uluknanain buka nafatin akompaña oan sira, tuir nafatin sira, iha momentu hotu, daruak buka atu kolabora nafatin no serbisu hamutuk ho madre sira no professores sira  no ikus liu mak buka atu pasiénsia nafatin ho imi nia oan sira. wainhira madre hatoo tiha  mensajen badak, inan aman sira mós hamosu perguntas oioin , parte balun agradese ba eskola katolika, liu-liu mak madre sira nia akompañamentu ba ami nia oan sira ho responsavel maksimu. No iha balun ne’ebé fo sujestaun atu fo tan oras ekstra atu sira nia oan  aprende lingua Portugues no husu atu loron-loron pelomenus nafatin iha TPC atu nunee oan sira hakmatek no estuda. Ikus nian madre Alma hato’o ba aman inan sira katak, hakarak atu oan sira sai di’ak, labele hein rezultadu agora kedas maibé presiza pasiénsia, presiza akompaña ho ita nia orasaun ho ita nia kbiit rasik labele, maibé ho Maromak nia tulun. Enkontru ida ne’e remata iha tuku 12.00 otl, no ikus madre Paulina hodi eskola no komunidade nia naran hato’o agradese ba aman inan sira ne’ebé marka prezensa iha biban ida ne’e.

Madre nia vizita iha komunidade to’o loron 12- Maiu, hafoin han kalan hamutuk komunidade agradese madre Alma no akompaña madre fila fali ba uma provinsiál.

(Maria Sarmento Guterres)