Mensajen husi Amu-Papa Bento XVI ba loron ikus Kongresu Eukarístiku 2012
Iha konkluzaun Kongresu Eukarístiku nian Amu-Papa fó sai katak kongresu tuirmai nian sei selebra iha Cebu iha 2016
Domingu, 17 Juñu 2012
Maun-alin doben sira,
Ho domin boot iha Nai, ha’u kumprimenta imi hotu ne’ebé halibur iha Dublin ba Kongresu Eukarístiku Internasionál da-50, liuliu Kardeál Brady, Arsebispu Martin, kleru sria, relijiozu sira no sarani sira Irlandia nian, no imi hotu ne’ebé mai husi dook atu fó apoiu ba Kreda Irlandia nian ho imi-nia prezensa no orasaun sira.
Tema kongresu nian “Komuñaun ho Kristu no entre ita” lori ita atu reflete kona-ba Kreda nu’udar mistériu komuñaun nian ho Nai no ho membru sira nia isin nian. Husi kedas inísiu konseitu koinonia nian ka communion nian mak núkleu sentrál iha Kreda nia komprensaun kona-ba an rasik, nia relasaun ho fundadór, no sakramentu sira ne’ebé nia selebra, liuliu Eukaristia. Liuhusi ita-nia Batizmu, ita inkorpora iha Kristu nia mate, moris hi’as iha família boot maun-alin sira Jezús Kristu nian; liuhusi Krizma ita simu marka Espíritu Santu nian; no hodi ita-nia partilla iha Eukaristia, ita tama iha komuñaun ho Kristu no entre ita ho modu vizivel iha rai ne’e. Ita mós simu peñór ba moris rohan-laek ne’ebé sei mai.
Kongresu ne’e akontese iha tempu ida ne’ebé Kreda iha mundu tomak prepara an daudaun atu selebra Tinan Fiar nian ne’ebé marka aniversáriu da-50 inísiu Konsíliu Vaticano II nian, eventu ida ne’ebé lansa renovasaun boot liu Ritu Romanu iha ita-nia tempu. Bazeia ba apresiasaun kle’an ba fonte sira liturjia nian, Konsíliu promove partisipasaun kle’an no ativa sarani sira-nian iha sakrifísiu Eukaristia nian. Husi tempu Padre konsiliár sira nian ne’ebé esprime hakaran kona-ba renovasaun liturjikál, no iha kreda universál nia esperiénsia nia roman iha períodu intervensaun nian, klaru katak buat barak ita hala’o ona; maibé klaru mós katak iha inkomprensaun no irregularidade barak. Renovasaun sira forma esterna nian, ne’ebé Padre sira Konsíliu nian hakarak, nia meta maka atu lori ema atu iha enkontru pesoál ho Nai, presente iha Eukaristia, no ho Maromak, atu liuhusi kontaktu ho Kristu nia domin, nia maun-alin sira nia domin ba malu bele mós buras. Maibé dala barak, revizaun ba forma litúrjika sira hela de’it iha nivel esternu, no konfunde tiha “partisipasaun ativa” ho “atividade esterna”. Tanba ne’e sei iha buat barak atu halo iha dalan renovasaun loos liturjia nian. Iha mundu ida ne’ebé muda, ne’ebé fihir ba beibeik sasán materiál sira, ita tenke aprende atu rekoñese ho modu foun Nai Moris-Hi’as nia prezensa, ne’ebé mesak de’it bele halo ita-nia moris sai luan no kle’an.
Eukaristia mak Kreda tomak nia kultu, maibé nia mós rekere envolvimentu sarani ida-idak nian iha kreda nia misaun; nia kontein bolun ida atu sai Maromak nia povu santu, maibé mós ba santidade individuál; ninia selebrasaun halo ho ksolok boot no simplisidade, maibé mós ho modu dignu no ho reverénsia; eukaristia konvida ita atu arrepende ba ita-nia sala sira, maibé mós atu perdua ita-nia maun-alin sira; nia kesi ita hamutuk iha Espíritu, maibé nia mós fó orden ba ita hodi Espíritu hanesan atu lori lia-foun di’ak maksoin nian ba ema seluk.
Aleindisu, Eukaristia mak memoriál sakrífisu Kristu nian iha Krús, saran nia isin no raan iha aliansa foun no rohan-laek atu sala sira hetan perdua no mundu hetan transformasaun. Ba sékulu barak maka Misa forma ho kle’an Irlandia, no hodi nia kbiit no grasa jerasaun lubuk monje sira-nian, martir sira-nian no misionáriu sira-nian moris ho modu eróiku sira nia fiar iha rain rasik no habelar nia hakat liu tasi sira. Imi maka maksimuk Kreda ida ne’ebé sai tiha kbiit maka’as ba mundu nia di’ak, no hatutan domin kle’an no perseverante ba Kristu nia domin no ninia Inan nian ba ema barak, ema barak seluk. Imi-nia beiala sira iha Kreda Irlandia nian hatene oinsá haka’as an ba santidade no kontánsia iha sira nia moris pesoál, oinsá haklaken ksolok ne’ebé mai husi Evanjellu, oinsá promove importánsia hola-parte iha Kreda universál iha komuñaun ho Pedro nia Sede, no oinsá hatutan domin ba fiar no virtude sarani ba jerasaun seluk. Ita-nia fiar katóliku, nakonu ho sentidu radikál Maromak nia prezensa nian, hale’u ho fafurak ninia kriasaun nian, no purifika liuhusi peniténsia pesoál no konxiénsia kona-ba Maromak nia perdaun, mak eransa ida ida ne’ebé sai perfeitu no naburas bainhira hatuur ho modu regular iha Nai nia altár iha sakrífisiu Misa nian. Agradesimentu no ksolok ba istória fiar no domin nian sai nakdoko ho modu orrivel ho revelasaun sira kona-ba amlulik no ema konsagradu sira nia salan kontra ema sira ne’ebé entrega ba sira nia kuidadu. Envezde hatudu ba sira dalan ba Kristu, ba Maromak, envezde fó sasin kona-ba ninia bondade, sira abuza ema no hatún Kreda nia mensajen nia kredibilidade. Oinsá ita bele esplika realidade ida iha ne’ebé ema ne’ebé ho modu regular simu Nai nia Isin no konfesa sira-nia salan iha sakramentu Peniténsia ofende ho modu ida hanesan ne’e? Ida-ne’e hela nafatin mistériu ida. Maibé evidentemente, sira-nia kriztianizmu la haburas ona ho enkontru ksolok nian ho Jezús Kristu: ida-ne’e kestaun ida ábitu/tatoman nian. Konsíliu nia serbisu nia finalidade maka atu supera kristianizmu ida ho forma hanesan ne’e no deskobre filafali fiar nu’udar amizade pesoál kle’an ho Jezús Kristu ninia bondade. Kongresu eukarístiku soi mós finalidade hanesan. Iha-ne’e ita hakarak atu hasoru Nai Moris-Hi’as. Ita husu Nia atu kona ita kle’an. Atu Nia ne’ebé huu iis ba apóstolu sira iha Páskua, hodi komunika ba sira ninia Espíritu, haraik mós mai ita ninia iis, Espíritu Santu nia kbiit, hodi nune’e tulun ita sai sasin loloos ninia domin nian, sasin lialoos nian. Ninia lialoos mak domin. Kristu nia domin loos duni.
Ha’u-nia maun-alin doben sira, ha’u harohan atu Kongresu sai ba imi ida-idak esperiénsia espirituál fekunda komuñaun nia ho kristu no ninia Kreda. Tempu hanesan, ha’u hakarak konvida imi atu hamutuk ho ha’u harohan atu Maromak haraik nia bensan ba Kongresu Eukarístiku Internasionál tuirmai nian, ne’ebé sei hala’o iha 2016 iha sidade Cebu nian! Ba povu Filipinas nian ha’u hato’o ha’u nia saudasaun sira no asegura ha’u-nia orasaun durante períodu preparasaun nian ba enkontru ekleziál boot ida-ne’e. Ha’u laran-metin katak nia sei lori renovasaun espirituál lanahas, la’ós de’it ba sira maibé mós ba partisipante sira husi mundu tomak. Ba oras-ne;e ha’u saran imi hotu ne’ebé hola parte iha Kongresu ida-ne’e nian ba Maria, Maromak nia Inan nia protesaun, ba S. Patrick, patronu boot Irlandia nian; no nu’udar sinál ksolok no dame iha Nai, Ha’u fó ha’u-nia bensan apostólika.
