Dili – Ho ksolok boot  ohin loraik 9/5/18, Komunidade tolu : Divina Providensia, Saun Jose no Eusebia selebra festa madre Mazzarello nian, hahú ho Santa Misa,  Don Mario Codamo, Nunsio Apostólico nian mak presidi Misa. Iha omeiia nia dehan: Madre Mazzarello mak feto ne’ebé simples,humilde, no karidade nain, ho distansia ne’ebé dook  husi nia Uma ba Parokia, maibé ida ne’e la halakon nia laran manas ba Jesus iha Eukaristia, ho entuziasmu  ba lorloron ba tuir Santa Misa.

Ikus nian nia dehan tan, nune’e imi ida-idak hakas-an atu banati tuir  Madre Mazzarello nia ezemplu domin nian ba Maromak no karidade konkretu iha moris lorloron nian hodi moris tuir nia ezemplu Santidade nian. Remata misa komunidade Divina Providensia no Komunidade Saun Jose reza tersu hamutuk hodi halo festa ne’e sai kompletu liutan, maibé la’os to’o de’it iha tersu. Hanesan baibain tuir ita nia tradisaun atu festa ne’e sai Solene liutan iha kalan komunidade Divina Providensia no Komunidade Saun Jose halo rekreio hamutuk, Madre Gianna iha nia boa noite hato’o mensajen badak ba foin-sa’e sira atu moris ho buat ne’ebé  hafoin ida-idak simu prezente husi Madre Mazzarello nia surat  ne’ebé grupu Liturgia sira prepara nu’udar mensajen furak ba foinsa’e no Irman sira ida-idak atu moris tuir buat ne’ebé Madre Mazzarello husu.

(Isabel Gomes)