Venilale – Selebra festa Madre Mazzarello iha Venilale, halo dala rua. Ida mak komunidade Madre Mazzarello ne’ebé nia obra ida mak Escola Técnico-Vocacional Hotelaria e Turismo no nia padroeira mak Madre Mazzarello. Festa halo ho inan-aman sira iha loron 4-5 Maiu liubá. Daruak mak 9 Maiu, halo ho labarik sira orfanatu no konvida mós grupu sira Família Saleziana nian hanesan ADMA, Salezianu Kooperadór/a sira no SDB.

Selebrasaun halo ho Missa iha parókia no selebrante mak Pe. Júlio Mota. Pe. Júlio, iha ninia omilia, hahú ho pergunta ida: “Oinsá imi koñese Madre Mazzarello?” Labarik sira hatán katak hodi “haree filme, lee…”. No Padre Júlio hatutan katak “ita bele haree Madre Mazzarello hodi hateke ba Irmán FMA sira nia moris”. Liafuan sira-ne’e sai sasukat atu FMA sira avalia sira-nia moris, se sira sai fiél ba karizma, ba Madre Mazzarello nia hanorin, ba legadu Don Bosco husik hela mai ita, ba ninia hakaran atu “sai monumentu moris gratidaun nian ba Maria Tulun-Na’in”. Sai gratiduan, sai “Maria Tulun-Na’in nia oan-feto sira”! Misaun boot! Misaun atu halo buat ne’ebé Don Bosco halo ba labarik mane sira!

Komunidade Madre Mazzarello, iha loron 9 Maiu dedika mós loron ne’e ba formasaun Irmán perpétua sira-nian, tuir tema ne’ebé Inspetora prepara: “Moris relijioza no Maromak nia Liafuan”. Moris relijioza eziste tanba Maromak nia Liafuan ne’ebé bolu loron ba loron… Liafuan ne’ebé ita lee, medita loroloron tenke tama no imprimi iha ita, sai ita-nia estrutura, atu nune’e ita-nia moris inkarna Maromak, hanesan Na’i-Feto.

Durante kampaña eleitorál, ema uza knananuk, slogan, poster, sitcker, atu hakonu ema ho liafuan “partidu polítiku” ida nian. Ne’e hotu modalidade “brain washing”, atu imprimi iha ema ideolojia ida. Loloos ba relijioza ida,  Kreda mós fó dalan atu ita halo Maromak nia Liafuan tama iha ita-nia kakutak, imprimi iha fuan, nakfilak ita-nia moris… ne’e mak pasu sira “lectio divina” nian. Partidu polítiku sira halo buat hotu atu imprimi sira-nia ideolojia, oinsá ita FMA halo buat hotu atu imprimi Maromak nia Evanjellu Ksolok nian iha ita-nia fuan, nu’udar saleziana, katak nu’udar ida ho misaun espesífika ba foin-sa’e sira? «Esperiénsia pesoál kona-ba Kristu ne’ebé Don Bosco no Madre Mazzarello halo, mak xave atu interpreta Maromak nia Liafuan ho modu salezianu; ne’e katak Don Bosco no Madre Mazzarello nia moris no obra sai mai ita “Maromak nia Liafuan inkarnada”».

Se karik ita FMA sira mak radikál hanesan ne’e ba Maromak nia Liafuan, ita-nia moris mós sei sai radikál, katak sasin loloos radikalidade evanjélika no vida relijioza saleziana ne’e. Hanesan buat ne’ebé ita hetan iha Madre Mazzarello nia moris rasik. Ninia Surat sira sai prova ida (bukti) katak Madre Mazzarello imprimi Maromak nia Liafuan iha ninia fuan. Iha ninia surat sira nalian Evanjellu, nalian Apóstolu sira-nia Hahalok, nalian epístola sira S. Paulo nian, nalian Maromak nia Liafuan. Se hanesan ne’e duni, ita bele dehan katak ita-nia moris mak espellu ka lalenok ne’ebé hatudu Santa Maria Domenica Mazzarello ba ema seluk, tuir Pe. Júlio ninia liafuan sira iha omilia.