Solenidade Axensaun Jezús nian ne’ebé ohin ita selebra fó hanoin mai ita katak, iha dalan ida halo ho domin no saran-an nia rohan/finál mak moris definitiva, komuñaun nian ho Maromak. Nia fó hanoin mós katak Jezús husik mai ita sasin no ita ne’ebé tuir nia mak tenke kontinua realiza Maromak nia projetu libertadór ba ema sira no ba mundu.

Iha Evanjellu, Jezús resusitadu mosu ba eskolante sira, tulun sira manán deziluzaun no komodizmu no haruka sira iha misaun, nu’udar sasin salvasaun Maromak nian. Besik ba Aman, Jezús sei kontinua akompaña eskolante sira no liuhusi sira, oferese ba ema hotu moris foun no moris definitivu.

Iha leitura dahukuk repete mensajen esensiál festa nian: Jezús, aprezenta tiha ba mundu Maromak nia projetu, nia tama iha moris definitivu komuñaun nian ho Maromak – moris hanesan ba sira ne’ebé la’o tuir Jezús nia dalan. Nune’e eskolante sira la bele hateke nafatin ba lalehan, iha pasividade ida ne’ebé la tulun; maibé tenke bá iha ema sira nia leet hodi kontinua Jezús nia projetu.

Leitura daruak konvida eskolante sira atu iha konxiénsia kona-ba esperansa ne’ebé sira simu bolun atu hala’o (moris nakonu iha komuñaun ho Maromak). Sira tenke bá hasoru “esperansa” hodi kaer liman ba malu ho maun-alin sira – membru sira “isin” ida de’it nian – no iha komuñaun ho Kristu, “isin” ne’e nia “ulun”. Kristu horis iha nia “isin” katak Kreda; no liuhusi nia mak Kristu sai prezente ba ema sira.

Download