Venilale – Dia 6 de Maio, ami  Comunidade Maria Auxiliadora  selebra festa São Domingos Savio nian, liu- liu orfão sira ne’ebe fo onra ba nia nu’udar sira nia Padrueiru liu husi orasaun,  drama, poezia, kantu no dansa.

“ Ami orfaun sira sente haksolok tebes ba loron ohin nian tanba ami bele espresa ami nia domin no agradesimentu ba Saun Domingos Savio ne’ebe tau matan nafatin ba ami. Liu husi drama badak, ami hanoin fali epizodiu ruma kona ba nia moris simples no hahalok sira ne’ebe ami bele banati tuir liu-liu wainhira nia hela ho Don Bosco. Husi buat ne’ebe ami hatene kona ba nia, ami halo poezia ne’ebe simples atu resita no kantu atu hananu ba nia. Depois ami grupu lima nia apresentasaun, Me. Cecilia  mos fo liafuan diak ruma mai ami hodi dehan : ‘’ Tuir Domingos Savio, atu sai santu mak fasil , buat ne’ebe  presisa deit mak  : 1. Haksolok nafatin 2. Hala’o ó nia knaar loron-loron ho diak 3. Hetan Jesus iha moris loron-loron nian 4. Fó tulun ba ó nia maluk sira 5. Ó nia belun sira mak Jesus no Maria’’. No Madre  mos fahe ho ami ida-idak , Domingos Savio nia mensajen ne’e iha kertas kiik ida, ne’ebe ami sei taka iha kadernu  atu fó hanoin mai ami iha loron loron. Ami hadomi ami nia Padruieru São Domingos Savio. Obrigada barak.

Husi : Leticia Candida Freitas ( 8º ano)

Entre Poezia no kanta sira ne’ebe kada grupu apresenta, ida ne’ebe diak liu mak ida ne’e

POESIA

Domingos Savio mak ami nia padrueiru

Tau matan mai ami

Tulun ami atu hadomi Jesus no Maria

Haboot liutan ami nia domin ba Jesus.

Domigos Savio ó mak santo ida

Domingos Savio moris iha uma Don Bosco

Hatudu dalan mai ami

Atu moris tuir ó nia hahalok.

Domingos Savio o mak santo kiik ida

O nia laran mos no nabilan

Ami sei haklaken o naran.

Domingos Savio ami hadomi ita.

Domingos Savio ó mak modelo santidade nian

Ami hakarak tuir ó, loron ida.

Domingos Savio ó mak santo ida.

Hakarak mate maibe laiha sala.

Canto :

Domingos Savio ami nia padroeiru

Mai loke ami nia hanoin

Atu banati tuir ita nia santidade Cristo nian.

Reef : São Domingos Savio mai iha ami nia le’et.

Diak liu mate duke halo sala.

Domingos Savio ami nia padrueiru

Mai loke ami nia fuan. Atu hakbesik ba Cristo

ami nia mata dalan.

 

Ami remata selebrasaun ida ne’e ho merenda hamutuk no taka ho Terço, orasaun ne’ebe  Domingos Savio reza tanba domin boot ba Nain Feto.

(Cecilia del Mundo)