Sidade Vaticano – Iha katekeze kuarta, 2 Maiu nian, Amu-Papa Francisco dedika ba ritu sentrál sira Batizmu nian.

Elementu dahuluk ne’ebé Amu-Papa temi mak bee, bee ne’ebé amlulik invoka tiha ona Espíritu nia kbiit atu hafoun no hamoris. “Bee mak knotak moris no bem-estar nian, basá bainhira kuran bee provoka atu fekundidade hotu mate, hanesan akontese iha dezertu: maibé bee mós bele hamosu mate, bainhira hamout iha nia laloran sira nia leet eh ho kuantidade boot lulun buat hotu; ikusnian, bee iha kapasidade atu fase, hamoos no purifika”. Maibé, Papa Francisco subliña katak kbiit eh podér atu perdua salan la’ós iha bee nu’udar bee maibé iha Espíritu Santu nia kbiit.

Bainhira santifika ona bee iha bee-matan, mai momentu atu prepara fuan atu simu Batizmu, ne’ebé akontese ho hahalok hakribi Satanás no ho profisaun fé nian. Hodi dehan lae ba diabu nia sujestaun sira – diabu mak ida-ne’ebé fahe – ha’u iha forsa atu dehan “sin” ba Maromak ne’ebé bolu ha’u atu sai hanesan Nia iha hanoin no iha hahalok. “Diabu hafahe; Maromak sempre halo komunidade sai ida de’it”.

Papa Francisco destaka tan katak hahalok rua ne’e – hakribi Satanás no profesa fé – iha ligasaun metin ba malu. “Labele adere ba Kristu hodi tau kondisaun sira. Presiza hadook an husi ligasaun ruma atu bele tebes duni hakohak sira seluk; hili di’ak ho Maromak ka hili di’ak ho diabu. Tanba ne’e hahalok hakribi no hahalok fiar nian la’o hamutuk”.

Amu-Papa observa katak resposta ba pergunta ne’e – “ó hakribi Satanás?” – halo ba ema ida-idak mesak, – “Ha’u hakribi”, nune’e mós profesa fiar iha Igreja – “Ha’u fiar”. “Ha’u hakribi no ha’u fiar: ne’e mak baze Batizmu nian. Ne’e mak hilin responsavel ida, ne’ebé ezije atu tradús iha jestu konkretu sira konfiansa nian ba Maromak”.

“Maun no biin-alin sira, bainhira ita tau liman iha água-benta –  iha momentu tama iha igreja ida ita kona água-benta – no halo sinál Krús nian, mai ita hanoin ba ksolok no gratidaun iha Batizmu ne’ebé ita simu – no ita hafoun ita-nia ‘Amén’ – ‘Ha’u haksolok’ – atu moris iha Santíssima Trindade nia domin”.