Ita sai santu/a hodi moris “rahun-di’ak sira”, dalan prinsipál tanba “bá kontro korrente” kontra mundu nia diresaun. Bolun ba santidade ba ema hotu, tanba Igreja sempre hanorin katak ida-ne’e mak bolun universál no posivel ida, hanesan santu barak hanorin mai ita.

Vida santidade nian liga metin ho vida mizerikórdia nian, “xave ba lalehan”. Tanba ne’e, santu ida mak ema ne’ebé hatene laran-sadia atu tulun ema moris susar no kura sira-nia moris-mukit.

Ezortasaun ne’e la’ós “tratadu”ida, maibé konvite ida

Iha espíritu ksolok nian mak Papa Francisco hili atu tau iha abertura ninia Ezortasaun ikus ne’e, ho títulu “Gaudete et Exsultate”, “Imi haksolok no hawelok bá,” nune’e, tenik hikas Jezús nia liafuan sira diriji ba “ema sira ne’ebé hetan persegisaun tanba Nia”.

Dokumentu ne’e iha kapítulu lima no paráfrafu 177. Amu-Papa tuir liña ninia majistériu profundu liu, kona-ba Igreja besik ba “Kristu sofredór nia isin”. Ho ezortasaun apostólika ida-ne’e nia hakarak nalian hikas bolun ba santidade hodi hatudu “ninia risku sira, dezafiu sira no oportunidade sira”(n. 2).

Klase média santidade nian

Molok hatudu saida mak tenke halo atu sai santu, Papa Francisco ko’alia kona-ba “bolun ba santidade”: “Atu sai santu, la nesesáriu sai bispu, amlulik, relijioza ka relijiozu. Dalabarak ita iha tentasaun atu hanoin katak santidade rezerva de’it ba ema sira ne’ebé iha posibilidade atu hadook an husi okupasaun komún sira, atu dedika tempu ba orasaun”. Nia reafirma: iha dalan ida perfeisaun nian ba ema ida-idak no la iha sentidu atu lakon korajen hodi bainhira kontempla “modelu sira santidade nian ne’ebé hanesan imposivel atu atinji” ka buka “imita buat ruma ne’ebé la’ós ba an rasik”. (n. 11).

“Santu sira ne’ebé to’o ona iha Maromak nia prezensa “proteje ita, tahan ita, akompaña ita” (n. 4), Amu-Papa resalta. Maibé, santidade ne’ebé Maromak bolu ita, sai boot ho “jestu ki’ik-oan sira”, “klasse média santidade nian” (n. 7).

Dalan ualu santidade nian

Depoizde Amu-Papa identifika inimigu sira santidade nian, nia evidensia dalan ualu santidade nian katak “Rahun-di’ak sira”. Nia halo revizaun ba ida-idak. Husi pobreza fuan nian – ne’ebé signifika mós austeridade moris nian (n. 70) – ba reaje “ho laran-maus” iha mundu ida ne’ebé halo funu iha fatin hotu (n. 74). Husi “korajen” atu husi ema seluk nia terus “sona borus” ita no iha “kompaixaun” ba sira – enkuantu “mundu la haree, hateke sees tiha ba sorin” (nn 75-76.) – ba hamrook ba justisa.

Realidade hatudu mai ita katak fasil tama iha reuniaun ema sira ho karákter aat korrupsaun nian, halo parte polítika loroloron “ha’u fó atu sira fó ha’u”, iha ne’ebé buat hotu mak negósiu. No ema sira ne’ebé sofre tanba injustisa kontinua haree, ho kbiit-laek, oinsá ema seluk troka malu atu fahe bolu moris nian”. (nn. 78-79).

Husi “hateke no atua ho mizerikórdia”, ne’ebé signifika tulun ema seluk :no perdua mós” (nn. 81-82), “rai fuan moos husi buat hotu ne’ebé hafoer domin: ba Maromka no maluk, ne’e mak santidade. (n.86).

“Kuda dame” no “amizade sosiál” ho “serenidade, kriatividade, sensibilidade no matenek” – konxiente kona-ba difikuldade atu harii ponte sira entre ema lahanesan (nn. 88-89) – hodi  hodi aseita mós persegisaun sira, tanba ohin loron koerénsia ba “Rahun-Di’ak sira “ema bele haree la di’ak, ho suspeita, hamoe” no, maski nune’e, ita labele hein katak, atu moris Evanjellu, buat hotu haleu ita favoravel mai ita” (n. 91).

Regra boot komportamentu nian: mizerikórdia

Husi rahun-di’ak sira, “Rahun di’ak ba sira ne’ebé laran sadia” mak regra boot ba sarani sira nia komportamentu, ne’ebé ita hetan iha Mateus nia kapítulu kona-ba “Juízu Finál”.

Pájina ne’e hatudu katak “sai santu la signifika foti matan ba tipu ida éstaze nian” (n. 96), maibé moris Maromak liuhusi domin ba ema ki’ik liu.

Infelizmente, Amu-Papa observa, eziste ideolojia sira ne’ebé estraga Evanjellu”. Husi parte ida sarani sira lahó relasionamentu ho Maromak, ne’ebé trasforma kristianizmu ba “tipu ida ONG, hodi halakon nia husi espiritualidade ne’ebé naksira husi nia”, ne’eb’e hatudu iha S. Francisco de Assis, S. Vicente de Paulo, Santa Teresa de Calcutá sira nia moris. (n. 100). Husi parte seluk, ema sira ne’ebé “suspeita ema seluk nia kompromisu sosiál”, hodi konsidera nu’udar buat ruma superfisiál, mundanu, sekularizadu, imanentista, “komunista ka populista”, eh “relativiza” hodi étika ida nia naran.

Amu-Papa afirma hikas defeza bebé nian, nu’udar “defeza dignidade vida umana, ne’ebé nafatin sagrada” (n. 101). Simu ema migrante sira mós devér sarani hotu nian, tanba iha ema estranjeiru hotu iha Kristu, no “la’ós Papa ida nia invensaun, la’ós mós delíriu ida ne’ebé liu de’it” (n. 103).

Nune’e, Amu-Papa konvida atu “gasta” iha obra mizerikórdia sira, no troka mentalidade “goza vida” hanesan “konsumizmu edonista” konvida (nn. 106-108). “Se ita la kultiva austeridade, se it ala luta kontra isin-manas ne’ebé sosiedada konsumu nian impoin mai ita hodi faan sasán sira, ita sei nakfilak ba ema kiak insatisfeitu sira ne’eb’e hakarak iha no koko buat hotu” (n. 106).

Iha kapítulu IV, Papa Francisco hato’o fali karakterístika sira “indispensavel” atu komprende estilu ida vida santidade nian: “perseveransa, pasiénsia no laran-maus”, “ksolok no sensu umór”, “aten-barani no fervór”.

Dalan santidade nian mak dalan ida halo “iha komunidade” no “iha orasaun konstante”, ne’ebé to’o ba “kontemplasaun”, maibé la’ós halai sees husi mundu haleu ita (nn. 110-152).

Luta vijilante no intelijente

Moris sarani mak luta ida “konstante” kontra “mentalidade mundana” ne’ebé “lohi ita, halanu ita no halo ita sai medíokre” (n. 159). Tanba ne’e, iha kapítulu V Amu-Papa remata hodi konvida atu hal funu hasoru Malignu ne’ebé la’ós “mitu” ida, maibé “ser pesoál ida ne’ebé atormenta ita” (n. 160-161).

Tuir Amu-Papa, ema ne’ebé la rekoñese ida-ne’e, sei hasoru frakasu ka mediokridade. Ita tenke hasoru ninia tátika ka trik sira ho “vijilánsia”, hodi uza “kilat ho kbiit” orasaun nian, adorasaun eukarístika nian, Sakramentu sira no ho vida ida nakonu ho karidade (n. 162).

Importante mós “dixernimentu” partikularmente iha tempu ida ne’ebé “oferese posibilidade boboot asaun no distrasaun nian” – viajen nian iha tempu livre, uzu deskontroladu teknolojia nian – “iha-ne’ebé la husik espasu mamuk atu Maromak nia lian nalian”. Papa Francisco husu kuidadu espesiál ba joven sira tanba sira mak espoin liu ba “zapping” iha mundu virtuál sira dook husi realidade (n. 167).

“Ita la halo dixernimentu atu deskobre saida mak ita bele hetan liután husi moris ne’e, maibé atu rekoñese oinsá ita bele kumpri di’ak liután misaun ne’ebé fó mai ita iha Batizmu” (174).