Venilale – Ba loron Mundiál Orasaun ba Vokasaun, komunidade Maria Auxiliadora konvida feto-raan sira husi Eskola nível sekundária no Técinco-Vocacional atu hasoru malu kona-ba vokasaun.

Husi partisipante sira ne’ebé hatán ba konvite ne’e iha foin-sa’e na’in 19: 13 husi ETV (11 hela iha lar, 2 iha li’ur) no 6 husi Escola Secundária Pública. Escola Secundária Católica, S. João Bosco la iha feto-raan ida.

Enkontru ne’e envezde halo iha Loron Mundiál Orasaun nian ba Vokasaun (Domingu IV Páskua nian -Bom Pastor), halo fali iha  Domingu V Páskua nian (29-4-2018), tanba kontra-tempu ne’ebé oraganizadora sira hasoru.

Formasaun aprezenta husi Ir Olga Belo, nia tema mak kona-ba “saida mak vokasaun”, katak “chamamento”, signifika “tendénsia ka abilidade profisionál ida maibé mós talentu ida, aptidaun ida, jeitu naturál ida ne’ebé ema ida iha. Vokasaun mak don pesoál ida Maromak konkretamente book ita”.

Entre atividade ne’ebé halo mak aprezentasaun “salesian express” husi formanda sira, no husi ETV hato’o knananuk ida ho títulu “É Cristo que me chama a ser feliz” no hafoin ba vizita orfanatu. “Impresaun boot tebes haree labarik sira simu ami hanesan bainaka importante liu”, Lourdes no nia kolega sira husi ETV dehan.

Iha kalan (buona notte), menina na’in rua hodi sira na’in sanulu-resin-ida nia naran fahe sira-nia esperiénsia iha enkontru vokasionál ne’e. Lourdes hateten katak “ita ema nia vokasaun dahuluk mak moris iha mundu no vokasaun daruak mak sai ema sarani bainhira simu batizmu no hafoin iha mós vokasaun sira hanesna leigu/a no vokasaun relijioza no amlulik (Sakramentu Orden)”.

Menina seluk ne’ebé reprezenta grupu mak Jenifer, no nia subliña katak “enkontru ne’e ho títulu ‘Mai no haree’, nune’e ami na’in sanulu-resin-ida ba kraik atu haree hodi deskobre ami-nia vokasaun loloos mak saida ka atu deskobre Maromak nia bolun ka hakaran mak saida loos mai ami”. Nune’e “Se Maromak bolu duni ami, ami sei halo oinsá? Ne’e mak pergunta ba ita hotu, la’ós mai ami de’it atu hatán”, nia hatutan.

Atu remata, Jenifer fahe katak “maski ami bá enkontru vokasionál, la dehan katak ami hotu pronta, ami balun iha dúvida nune’e, atu hatene didi’ak vokasaun presiza halo buat tolu, katak reza, ba Missa loroloron no konfessa beibeik”.

(Fernanda Varela)