Baucau – Iha loron 28 fulan Abril 2018, formasaun ba animadór/a sira zona Baucau nian katak animadór/a sira husi komunidade FMA Madre Mazzarello no Maria Auxiliadora Venilale, husi koléjiu SDB Fatumaka no husi komunidade FMA no SDB Baucau, joven sira hamutuk na’in 80 mak tuir formasaun animadór/a sira-nian ida-ne’e. Fatin enkontru ne’e hala’o iha salaun iha komunidade SDB  Baucau.

Joven na’in 80 ne’e mak animadór/a sira oratóriu sentru sira FMA no SDB nian. Tuir responsavel pastorál sira nia sujestaun katak ohin loron, buat ne’ebé mak dezafiu ba sosiedade no liuliu ba foin-sa’e sira mak la rona malu, dalaruma rona maibé laiha interese nune’e ikus la kompreende atu aplika ba moris buat ne’ebé sira rona. No tuir Estreia Reitór-Mor, Pe Ángel Fernandez, ba tinan ida ne’e, subliña liu kona-ba dimensaun tolu: RONA, DIXERNIMENTU no AKOMPAÑAMENTU. Nune’e responsavel Pastoral Juveníl nian, husu Ir. Lucia Pereira, FMA atu hakle’an pontu dahuluk kona-ba RONA ho foin-sa’e animadór/a sira.

Iha enkontru ne’e maske naruk uituan maibé joven sira partisipa ativamente, balun dehan di’ak se ema hotu-hotu kompreende kona-ba tema rona ne’e. Balun hakbesik Ir. Lucia hodi agradese pesoalmente tanba buat foun ba sira. Balun fali dehan ohin loron ita presiza liu atu rona malu tanba dalabarak ema tur iha ita-nia sorin, ita “sibuk” fali ho ita-nia smartphone ka WA, FB, nst… Joven sira iha impresaun oioin. Tebes duni, enkontru ne’e riku liu, la’os sira ne’ebé rona mak enjoy maibé mós ida ne’ebé ko’alia deskobre buat lubuk ida foun ba moris. Hotu tiha tiha enkontru joven barak dehan, empeñu boot mak atu pratika ho labarik no entre ami joven no ho boot sira.

(Lucia Pereira)