Cailaco – Espiritualmente ohin Família Saleziana iha mundu tomak selebra festa agradesimentu madre Jerál nian. Madre jerál mak nudar tali komuñaun no sentru unidade nian ne’ebé unifika irmán ida-ida iha mundu tomak atu fiel nafatin ba karisma Institutu nian nu’udar liman-rohan espirituál ne’ebé ita-nia Fundadór no Fundadora husik hela mai ita hodi fó atensaun mós ba ezijensia sira kreda ohin loron nian.

Hodi hatudu  sensu hola parte ba Institutu no espresaun gratidaun ba Maromak ba Me. Jerál  nia prezensa iha Institutu,  komunidade Kailaku hamutuk ho komunidade edukativa hasa’e misa agradesementu nian ba Me. Jerál, hodi husu Na’i nia bensaun no grasa atu nia sai nafatin instrumentu no espresaun Maromak nia domin nian ba Família Saleziana iha mundu tomak. Iha omilia Amu Norbertu hateten katak knaar animasaun presiza ita nia orasaun no suporta  atu desizaun hotu nafatin tuir Nai nia hakarak.

Maske selebrasaun simples deit maibe nudar ami nia espresaun domin no gratidaun  nian ba Me. Jerál.  Depois de misa iha mos menina nain 6 ne’ebé hakarak atu esperiensia Maromak nia hakarak ba sira nia moris iha ita nia Institutu iha futuru. maske idade sei naton maibé  espresaun espontaña ne’e bolu ita nia atensaun atu tulun sira iha sira nia la’o dalan. Ita reza atu okaziaun importante institutu nian bele sai bolun vokasaun nian iha ita nia Institutu.

(Albina do Carmo)