Soibada – Ho ksolok tebes, Ema sarani oioin mai husi Dioseze tolu halibur hamutuk iha Soibada hodi halo peregrinasaun. Na’i-Feto Aitara iha foho nia tutun sai ba povu Timór fatin peregrinasaun. Peregrinasaun katak ema lubun boot, ema la’o rai, sai hosi rai ida fatin Santu atu hasa’e sira nia orasaun, sira nia  hakaran no sira nia hanoin hodi husu tulun no grasa.

Iha loron 12 loraik missa ba ema moras sira, preszide husi Amu-Bispu Norberto no akompaña husi Amu-Bispu Alberto Ricardo. Hafoin kontinua ho prosisaun hodi lori Santíssimu ba Parókia no remata ho velada tuir oráriu ne’ebé ema komisaun sira marka tiha ona.

Iha loron 13 dadeer sarani hotu halibur hamutuk simu Núnsiu Apostóliku repezentante vatikano nian iha Kreda Timór, D. Joseph Marino, hafoin mak halo prosisaun ho Na’i-Feto lori ba Santuáriu Nasionál Na’i-Feto Aitara nian. Misa prezide husi D. Basílio no iha omilia husi Núnsiu Apostóliku. Núnsiu haktuir katak Na’i-Feto iha krús-ain nu’udar ilas reprezenta ema sarani sira hodi lori krús rasik hodi la’o tuir Jezús. Senáriu oioin iha Evanjellu haktuir katak ema barak tuir Jezús ho maneira absolutu, Jezús bolu apóstolu  sira atu tuir Nia, sira prontu husik buat hotu hodi lao tuir Nia. Sira nunka husu se mak Jezús no sei lori ami bá ne’ebé maibé sira tuir de’it, ikus mai mosu transformasaun katak brani lori nia krús hodi la’o tuir Jezús.

• Tuir Jezús iha ezijénsia barak tanba Nia rasik mak eskolante ida hodi tuir Nia Aman to’o mate no lori Nia krús, la husu buat ida maibé buka hodi moris iha Aman.
• Jezús husu ita atu halo buat ne’ebé Nia hala’o ona, Nia husu atu hewai-an rasik; husik an rasik ne’ebe sentrál ba an rasik husik atu sai mós ba ema seluk
• Sai eskolante katak moris ba ema seluk, fó-an ba ema seluk no perdua ema seluk.

“Ema ida-idak nia vokasaun la hanesan maibé hanoin katak la lori mesak nia krús basá iha krús Jezús forma ema ida reprezenta ema hotu nian iha Kreda ne’e: Maria no Juaun. Maria mak ezemplu eskolante ne’ebé hamutuk ho oan hahú husi moris to’o mate, terus hamutuk ho oan. Nune’e ita nia halibur malu iha fatin santu ida ne’e atu hasa’e omenajen ba Maria husu Nia oinsá atu sai eskolante, husu nia atu intersede mai ita ho nia grasa no bensan”, núnsiu hateten.

(FMA BALIDE)