Maun no biin-alin sira, bondia!

 

Uluknanai ha’u hakarak agradese Maromak ba loron iha Assisi, loron rua liubá. Imi hanoin bá katak ne’e mak dala uluk ha’u ba iha Assisi no halo peregrinasaun ida-ne’e iha festa S. Francsico de Assis mak don boot ida mai ha’u. Ha’u agradese povu Assis nian ba sasimuk ho laran manas: obrigada barak!

 

Ohin, pasajen Evanjellu nian hahú nune’e: «Iha tempu ne’ebá apóstolu sira dehan ba Na’i: “Haboot ami-nia fiar!”» (Lc 17,5-6). Ha’u hanoin katak ita hotu bele halo invokasaun ida-ne’e. Ita mós hanesan Apóstolu sira ita dehan ba Na’i Jezús: “Haboot fiar iha ami!”. Sin, Na’i, ami-nia fiar ki’ik-oan, ami-nia fiar fraku, frajil, maibé ami oferese ba ita nune’e, atu ita haboot nia. Ha’u hanoin buat di’ak ita bele repete hamutuk: “Na’i, habppt fiar iha ami!” Ita halo? Hotu-hotu: Na’i, haboot fiar iha ami! Na’i, haboot fiar iha ami! Na’i, haboot fiar iha ami! Halo nia sai boot!

No Na’i hatán saida mai ita? Nia hatán: «Se imi iha fiar boot hanesan modo musan ida, imi bele dehan bai ai-hun ne’e: “Fokit ó-nia an no kuda ó-nia an iha tasi laran”, no nia sei halo tuir imi» (v. 6). Modo musan ki’ik liu, maibé Jezús dehan katak natón iha fiar hanesan ne’e, ki’ik-oan, maibé loos, sinseru, atu halo buat ne’ebé umanamente imposivel, hanoin-laek. No ida-ne’e loos! Ita hotu koñese ema simples sira, haraik-an sira, maibé ho fiar forte liu, ne’ebé fokit foho sira! Ita hanoin, porezemplu, ba mamá no papá ruma ne’ebé enfrenta situasaun todan liu; eh ba ema moras ruma, grave liu, ne’ebé hatutan laran-hakmatek ba ema ne’ebé ba haree sira. Ema sira-ne’e, loos duni tanba sira-nia fiar, sira la loko an ba buat ne’ebé sira halo, maibé, hanesan Jezús husu iha Evanjellu, dehan: «Ami atan foli-laek. Ami halo de’it buat ne’ebé ami tenek halo» (Lc 17,10). Ema na’in hira iha ita-nia leet mak iha fiar forte, haraik-an, no halo di’ak barak!

Iha fulan Outubru ida-ne’e, ne’ebé dedika ho modu partikulár ba misaun sira, ita hanoin ba misionária wain, mane no feto sira, ne’ebé atu lori Evanjellu sira supera obstákulu tipu oioin, fó tebes sira-nia moris rasik; hanesan S. Paulo dehan ba Timóteo: «Keta moe atu fó sasin ba ita-nia Na’i, no ba ha’u, ne’ebé iha kadeia laran tanba Nia; maibé, ho Maromak nia kbiit, ó mós terus ho ha’u tanba Evanjellu» (2 Tm 1,8). Buat ne’e kona ita hotu: ita ida-idak, iha moris rasik loron ba loron, bele fó sasin ba Kristu, ho Maromak nia kbiit, kbiit fiar nian. Fiar ki’ik-oan ne’ebé ita iha, maibé forte! Ho kbiit ida-ne’e fó sasin Jezús Kristu nian, sai sarani hodi moris, hodi ita-nia sasin!

No oinsá ita hetan kbiit ida-ne’e? Ita hetan husi Maromak iha orasaun. Orasaun mak respiru fiar nian: iha relasaun ida konfiansa nian, iha relasaun ida domin nian, labele kuran diálogu, no orasaun mak klamar nia diálogu  ho Maromak. Outubru mós mak fulan Rozáriu nian, no iha domingu dahuluk ida-ne’e iha tradisaun atu resita Súplika ba Na’i-Feto Pompei nian, Virjen Maria Santu Rozáriu nian. Ita hamutuk ho sira espiritualmente iha hahalok konfiansa nian ida-ne’e ba ita-nia Inan, no simu husi nia liman sira koroa Rozáriu nian: Rozáriu mak eskola ida orasaun nian, Rozáriu mak eskola ida fiar nian!