Domingu IV Páskua nian mak “Domingu Bibi-Atan Di’ak” nian, basá tinan-tinan iha domingu ne’e, liturjia propoin parte ida husi kapítulu 10 Evanjellu nu’udar João haktuir, iha-ne’ebé nia aprezenta Jezús nu’udar “Bibi-Atan Di’ak”. Ne’e mak tema sentrál ne’ebé Maromak nia Liafuan propoin ba ita-nia reflesaun.

Evanjellu aprezenta Kristu nu’udar “Bibi-Atan Modelu”, ne’ebé hadomi ho forma gratuita no lahó kolen nia bibi sira, to’o fó nia moris ba sira. Bibi sira hatene katak sira bele konfia Nia ho forma inkondisionál, basá Nia la buka nia di’ak rasik, maibé nia bibi sira nia di’ak. Buat ne’ebé importante atu hola parte ba Jezús nia bibi-luhan mak disponibilidade atu “rona” proposta sira Nia halo no tuir Nia iha dalan domin no saran an nian.

Leitura dahuluk afirma katak Jezús mak Makso’ik ida mesak, “la iha tan naran seluk iha lalehan okos, haraik ba ema sira, hodi hetan salvasaun”. Lucas fó hanoin atu ita keta monu ba figura sira seluk, ba dalan seluk, ba sujestaun seluk ne’ebé aprezenta mai ita proposta falsa sira salvasaun nian.

Iha leitura daruak, autór Surat dahuluk João nian konvida ita atu kontempla Maromak nia domin ba ema. Tanba Nia hadomi ita ho “domin boot” mak Maromak prontu atu lori ita atu manán ita-nia kondisaun frakeza no frajilidade nian. Maromak nia objetivu mak integra ita iha nia família no halo ita sai “hanesan” Nia.

Download