Venilale – Tinan ne’e Komunidade Edukativa Madre Mazzarello, Venilale hakarak selebra “Loron Rai nian” ka “Earth Day” maski  iha antesedénsia, tanba loron ne’e monu iha loron 22 Abríl,2018. Amu-Papa nia mensajen iha Laudato si (2015) atu “Tau Matan ba Ita-nia Uma Komún” nune’e mós prinsípiu Katóliku kona-ba tau matan ba kriasaun, nu’udar prinsípiu ida husi prinsípiu sira Hanorin Sosiál Kreda nian mak fó impulsu atu kontinua dalan ne’ebé Inspetoria FMA TIN hahú ona iha 2015.

Iha tinan ne’e, Komunidade edukativa buka atu halo hotu-hotu konxiente kona-ba “natureza nu’udar biin no maun” ida, tanba ita hotu “Maromak nia kriatura, hanesan S. Francisco de Assis hanorin, aleinde kontinua atiividade “hamenus lixu no resiklajen”. Hodi konversaun iha an rasik mak bele lori konversaun ekolójika. Kriasaun mak «projetu ida hosi Maromak nia domin» no presiza haburas “relasaun” armonia sinfonia nian entre ema no Maromak no ema ho sasán sira iha-ne’ebé «kriatura ida-idak iha funsaun ida no la iha kriatura ida ne’ebé la folin iha nia an-rasik» (LS 84).

Atividade sira ekolojia nian ne’e halo iha semana ida-ne’e ho konferénsia kona-ba “Laudato Si”, konkursu kona-ba limpeza, konkursu kona-ba resiklajen no konkursu halo video clip kona-ba Natureza, ho modu partikulár aprezenta fatin furak ida iha Venilale, hanaran “Ponte Natureza”.

“Ponte Natureza”, hatudu duni natureza ninia beleza naturál, la’ós artifisiál no natureza ninia kbiit atu auto-kria no auto-rejenera. Populasaun sira ne’ebé sai mahein ba fatin ne’e, iha duni atensaun atu turista sira la hafoer fatin furak no lulik ne’e. Lulik tanba Maromak nia liman-fatin, hanesan ita ema ne’ebé Maromak entrega kriasaun mai ita atu tau matan.

Estudante sira, professor/a Cipriano, Morais, Isaac, Manuel, Fernanda, Delima, Irmán Jacinta Gusmão, Yasintha, Alexandrina, Áurea, Maria no Libanha haksolok bele halo esperiénsia furak ne’e. Atu to’o ba Ponte Natureza sira lori oras rua. Maski kole, entuziazmu boot nafatin, no ho Maromak nia tulun buat hotu la’o di’ak.