Sidade Vaticano – Papa Francisco nia katekeze iha kuarta, 11 Abrí, dedika ba sakramentu Batizmu. Nia enfatiza importánsia sakramentu ne’e nian, pontu hahú nian atu hamoris konxiénsia kona-ba vida kristán ne’ebé tuir ninia natureza mai husi Kristu rasik, no tempu paskál iha loron 50 nia laran ne’e di’ak atu ita hanoin.

Amu-Papa Francisco esplika katak verbu gregu “batiza” signifika “imerje” (tama iha bee laran/luku), ne’e ritu komún iha krensa oioin atu esprime pasajen husi kondisaun ida ba seluk, nu’udar sinál purifikasaun nian. Ba sarani sira, Amu-Papa subliña nesesidade atu hanoin katak, se isin tama iha bee laran, klamar tenke tama iha Kristu, atu simu perdaun ba salan sira.

Hanesan nia halo iha okaziaun sira seluk, Amu-Papa tenik ninia konvite atu ida-idak hanoin ninia loron batizmu nian no komemora data ida-ne’e. “Ita hotu tenke hatene data ita-nia batizmu nian. Ne’e aniversáriu seluk: aniversáriu moris filafali nian”.

Papa Francisco dehan tan katak Batizmu halo ema sai membru Kristu nia Isin nian, katak Igreja, no partisipa iha nninia misaun iha mundu. “Ita batizadu sira la’ós izoladu: ita membru Kristu nia Isin nian”.

Atu taka, “Santo Padre”  esplika tanba sá sarani labarik, tanba ema balun hanoin katak tenke hein labarik sai boot, komprende ona no nia raisk mak husu Batizmu. Tuir PapaFrancisco, ida-ne’e signifika la iha konfiansa iha Espíritu Santu, tanba bainhia batiza labarik ida, Espíritu Santu tama iha nia no halo nia sai boot iha virtude sarani sira ne’ebé ikusmai sei nafunan.. “Sempre tenke fó oportunidade ida-ne’e ba ema hotu, ba labariks ira hotu, atu bele soi iha sira-nia laran Espíritu Santu ne’ebé gia sira durante sira nia moris. Imi keta haluha atu batiza labarik sira!”.

Batismo