Venilale – Maski iha tempu prova trimestrál nia laran, estudante ETV S. Maria Mazzarello, Venilale, liuliu sira ne’ebé hela iha koléjiu halo momentu marianu ida hamutuk ho Irmán sira, atu selebra loron Anunsiasaun Na’i nian.

Buat ne’e hotu atu tulun sira hakbesik ba Maromak nia Liafuan  aprende rona, dixerne no moris Maromak nia bolun. Oportunidade festa ohin nian, halo sira hateke ba feto-raan Nazaré nian nu’udar modelu “estraordináriu” ba dalan deskobre vokasaun rasik.

Momentu ne’e bazeia ba Evanjellu S. Lucas 1, 26-38, halo tuir estrutura “lectio” nian ho pergunta atu reflete. Grupu assosianizmu ida-idak iha knaar atu prepara momentu ida-idak. Momentu introdusaun mak leitura Evanjellu nian no depoizde leitura, grupu Madre Mazzarello hananu ho jestu “Angelus”.

Hafoin grupu lima seluk (Don Bosco, Arte, Laura, Maria, Animadora sira) gia momentu lima hanesan tuirmai ne’e: momentu bolun-eleisaun husi Maromak; momentu resposta husi Maria; momentu misaun; momentu konfuzaun no momentu konfirmasaun husi Maromak nia parte. Iha momentu ida-idak iha pergunta atu reflete no konfronta an ho Maromak nia Liafuan no Maria nia atitude. Grupu sira mós oferese orasaun Ave Maria nian ho intensaun ne’ebé hakohak nesesidade mundu no Rai TL nian, família, komunidade no pesoál, ema hotu ne’ebé presiza no moras, Irmán FMA sira liuliu Ir Floriana. Hafoin ida-idak prepara ai-funan ida atu oferese ba Na’i-Feto.

Atu feto-raan Nazaré nian ne’e, Virjen Maria, inspira menina sira balun atu tuir dalan saran an tomak ba Maromak hodi la ta’uk difikuldade sira, maibé barani ariska buat hotu ba rikusoin folin boot liu.