Loron datoluk festa jubileu tinan 25 FMA Nia prezensa nian marka ho vizita komunidade sira hodi haree oinsa’ karizma buras

 

Laga – Irmán Piera Cavaglià, irmán Felicidad Boado no irmán Paola Battagliola ohin 4 Outubru, hala’o vizita breve ida ba komunidade FMA sira iha Baucau, Fuiloro no Laga.

Iha ninia enkontru ho foin-sa’e, labarik no irmán sira, irmán Piera konvida sira atu agradese Maromak ba don karizma salezianu ne’ebé oras-ne’e sira bele koko ninia di’ak hodi lori sira halibur hamutuk iha uma saleziana sira, iha ambiente edukativu ida ksolok nian.

Hasoru foin-sa’e sira nia husu sira saida mak sira koko iha uma saleziana no sira hatán tanba sira bele estuda, tanba sira aprende buat oioin hanesan múzika, kanta, dansa, harohan no mós tanba iha ne’e sira hetan ksolok.

 

Loos duni, irmán Piera bele konstata katak foin-sa’e sira haksolok duni, espontánea no livre. Iha Fuiloro halibur animadór sira oratóriu nian no menina sira internatu nian ne’ebé fó benvinda ho knananuk no dansa. Sira hato’o agradese ba Institutu ne’ebé haruka FMA sira mai Timór tinan 25 liubá, hodi tau matan to’o ohin loron ba foin-sa’e sira. Maski menina sira kursu profisionál nian oras-ne’e iha estájiu, maibé foin-sa’e sira ne’ebé hela mós kriativa iha sira-nia dansa no knananuk ksolok nian. Ba sira irmán Piera hsuu atu kuida sira-nia moris no husik Maria gia sira la’ós de’it agora durante tempu estudu maibé mós ba moris tomak abanbairua nian, hodi sai sarani di’ak no sidadaun onestu.

Almosu hotu tiha komitiva kontinua nia viajen ba Laga. Labarik no menina sira, haksolok tebes to’o halo udan mós tuun iha bailoron boot ne’e. Irmán Piera dehan ba labarik sira katak nia bele haree sira-nia matan haksolok no hakmatek. Labarik sira mós aprezenta sira nia dansa kulturál oioin no bele haree katak hotu-hotu envolve maski ida-ne’ebé ki’ik liu hotu mós.

Ba FMA sira irmán Piera agradese ba sira-nia moris karizma salezianu maski buat ne’e hotu husu sakrifísiu no enkoraja sira atu halo karizma kontinua buras no inkarna iha kultura Timór nian hodi lori foin=sa’e barak besik liután ba mensajen Evanjellu nian.