Amu-Papa remata siklu katekeze kona-ba Santa Missa
Sidade Vaticano – Papa Francisco iha kuarta, 4 Abríl remata siklu katekeze kona-ba Santa Missa, ne’ebé nia hahú iha fulan Novembru 2017. Reflesaun ikus ne’e kona-ba ritu finál sira Missa nian: bensan ne’ebé amlulik fó no despedida povu nian.
“Sarani sira la bá Missa atu kumpri knaar semanál no hafoin haluha tiha, lae. Sarani sira bá Missa atu partisipa iha Na’i nia paixaun no Moris-Hi’as no moris liután nu’udar sarani: loke sira-nia an ba kompromisu no testemuñu kristaun”, nia hateten.
Papa Francisco hatutan tan katak, hodi sai husi Igreja, kompromisu mak “bá ho dame”, lori Maromak nia bensan iha atividade sira loroloron nian; kadavés sarani ida sai husi Missa nia tenke sai ema di’ak liután duké bainhira nia tama, Amu-Papa dehan, ho moris liután, ho forsa no vontade liután atu fó testemuñu kristaun.
“Ita keta haluha katak ita selebra Eukaristia atu aprende sai mane no feto eukarístiku/a. Ne’e signifika saida? Signifika husik Kristu atua iha ita-nia obra sira”, Amu-Papa observa, hodi hatutan latak frutu sira Missa atu halo sai tasak iha moris loroloron nian.
“Ita agradese Na’i ba dalan redeskoberta Santa Missa nian ne’ebé ita halo hamutuk no mai ita husik atu enkontru reál ho Jezús mate no moris hi’as mai ita atrai ita ho fiar foun. No atu ita-nia moris sai nafatin ‘nafunan’ hanesan ho Páskua, ho ai-funan esperansa nian, hahalok di’ak nian”.
