Liturjia domingu ne’e nian aprezenta mai ita komunidade Ema Foun sira nian ne’ebé moris husi Jezús nia krús no resurreisaun: Igreja. Ninia misaun mak hatudu ba ema sira moris foun ne’ebe mosu husi resurreisaun.

Iha leitura dahuluk ita iha, “fotografia” komunidade sarani Jerusalém nian, trasu sira komunidade ideál nian: komunidade ida forma husi ema oioin, maibé moris fiar ida hanesan ho fuan no klamar ida de’it; komunidade ida ne’ebé hatudu domin fraternu ho jestu konkretu partilla no don nian no katak, ho forma ne’e, fó sasin kona-ba Jezús moris-hi’as.

Iha Evanjellu ideia ida maka’as liu mak Jezús ne’ebé moris no moris-hi’as sai sentru komunidade sarani nian; komunidade estrutura an hadulas Nia no husi Nia mak komunidade simu moris ne’ebé anima nia no fó kbiit atu enfrenta difikuldade no persegisaun sira. Husi sorin seluk, iha moris komunidade nian (liturjia, domin, sasin) mak ema sira hetan prova katak Jezús moris hela.

Leitura daruak fó hanoin ba membru sira komunidade sarani nian kritériu sira ne’ebé define vida sarani auténtika: fiar-na’in loos nian mak ema ne’ebé hadomi Maromak, adere ba Jezús Kristu no ba proposta salvasaun nian ne’ebé, liuhusi Nia, Aman halo ba ema sira no moris iha domin ba maluk sira. Ema ne’ebé moris nune’e, manán mundu no integra an iha família Maromak nian.

Download