Cassa/Ainaro – Loron  dahuluk halao misaun iha Cassa Ainaro, 26 – Marsu- 2018, tuku 04.00 lorokraik,  hasoru malu ho pre-adolescente sira, ne’ebé prepara – an atu simu primeira Komuñaun iha kinta-feira santa, iha hasoru malu ida ne’e uluknanain mak aprezenta –an no koalia oituan kona ba FMA nia prezensa iha Cassa durante loron neen nia laran, hafoin madre Sebastiana esplika oituan kona ba sakramentu Eukaristia no katekese badak kona ba preparasaun atu simu komuñaun dahuluk.

Loron daruak ami nia misaun iha dader mak fo retiru ba familia sira, ho tempu hanesan katekese no animasaun mos ba pre-adolescente sira ne’ebe atu simu primeira komuñaun.  Modalidade retiru ne’ebé halao ho aman no inan sira mak, hahu kantu  invokasaun Espiritu santu nian, lee Maromak Nia liafuan, hafoin fahe ba grupo-grupo atu fahe ida-idak nia esperiensia bazeia ba Maromak nia  liafuan, depois de fahe Maromak Nia liafuan ikus liu prepara sira ba ezame de konsiensia. Atividade lorokraik nian halao katekese ba sira ne’ebé atu simu primeira komuñaun no ho tempu hanesan halao mos vizita ba eskola Pre-Secundaria 4 Setembru Cassa nian, iha atividade vizita ida ne’e, ami fahe ho estudante sira koñesementu oituan kona ba misaun FMA iha Timor, animasaun no esplika oituan kona ba tempu kuaresma, semana santa no pascoa, atividade seluk mak ensaiu hamutuk kanta ho joven no aman inan sira hodi prepara ba missa kinta-feira santa.

Loron  datoluk nian  iha kuarta –feira santa atividade ne’ebé ami hala’o mak hamoos igreja, fo retiru no selebrasaun penitensial ba grupo SMP no prepara labarik sira ne’ebé atu simu primeira komuñaun,

Iha kinta –feira santa iha konfesaun ba grupo ne’ebé atu halo primeira komuñaun, no iha lorokraik 06.30 OTL iha selebrasaun Eukaristia ho tempu hanesan labarik  92  simu primeira komuñaun. Padre Elidio SDB, nu’udar selebrante ba triduo Pascal iha Cassa Ainaro. Iha padre nia omilia nia hateten katak: “  Selebrasaun Kinta- Feira Santa lori ita hanoin hikas Jesus nia testemunha ikus molok atu mate. Iha Jesus nia momentu ikus nian, fo testament tolu (3) ne’ebé importante hodi husik hela mai ita : “ Jestu fase ain”, “ Eukaristia, sakramentu domin” no “ Sakramentu  Sacerdocio”. Jestu fase ain, Jesus hatudu mai ita  atitude haraik-an, hakarak atu serbi nu’udar atan, Jesus husu ita atu banati tuir Nia ezemplu, Padre dezafia mos inan aman sira atu hala’o mos knar nu’udar atan atu serbi oan sira, presiza halo jestu ida ne’e sai mos ita nian. Kona ba Sakramentu domin nian Jesus “ Silu hodi fahe ba ema hotu-hotu atu han” fo hanoin katak vida sarani la esklui ema ida, hotu-hotu simu hanesan, Kristu lahalo diferensia, nune’e sakramentu Eukaristia unifika ita no haforsa ita nia uniaun. Sakramentu Sacerdocio mak ho  batizmu halo  ita sai nailulik.

Wainhira remata missa, kontinua kedas ho adorasaun Santissimu, ne’ebé fahe ba grupo rua, Inan aman, no estudante sira, adorasaun too tuku 12.00 kalan.

Sesta- Feira santa, iha dader tuku 08.00 halao viasacra husi fatin naran Mundobol, ne’ebé ita la’o ain karik bele lori 30 minutu mak foin to’o, viasacra hahu husi ne’eba mai iha kapela Saun José Cassa. Maske loron manas makaas maibe sarani barak mak partisipa kompostu husi labarik, joven, aman inan no ferik katuas sira. Viascra remata tuku 11.00, hafoin lorokraik tuku 03.00 iha venerasaun ba kruz. Padre nia omilia ne’ebé nafatin interesante, lori sarani sira konsentra diak atu rona, iha nia omilia :” Koalia kona ba KRUZ fo hanoin mai ita buat tolu (3) importante liu.

1. Kruz signifika katak Domin Radikal, Total no laiha Limite.
2. Kruz katak Laiha Medida, Laiha preso katak folin boot liu, labele sosa ho osan
3. Kruz katak Konfiansa. Ita sarani tau ita nia konfiansa tomak iha Kristo Nia Kruz ne’ebe’ salva ita, no halo ita moris Hias no moris foun ho Jesus Nia Reisureisaun.

Iha  Sábadu dader tuku 10.00 OTL, iha batizmu ba adultu no kiik oan sira, maske batizmu deit maibé sarani barak mak partisipa iha selebrasaun  ne’e. Molok  batizmu hala’o katekese no animasaun ba labarik no pre-Adolescente sira ne’ebé iha. Ami nia apostuladu iha Suco Cassa mak too deit iha loron 31 dader.  Sarani Cassa sira nia esperansa mak hein Padre Salesiano no madre Salesiana sira nia prezensa iha sira nia rain. Iha okaziaun ne’e ami koko atu dada lia oituan ho sarani balun, professor/a, katekista. Buat ne’ebé sira hato’o mak

“Tuir ami nia observasaun no esperiensia iha ami nia rai Cassa, mak ami presiza tebes Madre no  Padre sira nia prezensa iha ami nia fatin, iha sarani barak ne’ebé frekuenta maibé ema ne’ebé atu orienta mak seidauk iha, dalaruma ami mestre, katekista fo hanoin atu hakbesik ba igreja maibé ladun fiar/ la rona, se karik Padre, Madre ou frater ruma koalia, dala ida deit sira tuir kedas hanesan dadaun agora madre sira haree, sarani sira igreja nakonu, nune’e atu dehan deit ami presiza simu formasaun barak husi Madre no Padre sira. No ikus ami sarani sira iha Cassa pronto atu tulun no serbisu hamutuk ho Madre sira, se karik Madre sira mai hala’o misaun iha ami nia fatin”.  Buat furak ne’ebé  ami deskobre iha Sarani sira Cassa mak, “ ema ne’ebé nakloke, simples, laran luak no ema sosial ( fahe buat ne’ebé sira iha, hatene hasee lalais no matan moris liu ba ema seluk nia presiza), no populsaun sira iha ne’eba husi labarik to’o katuas no ferik hatene tetun diak nune’e fasilita liu  iha komunikasaun.

(Maria Sarmento Guterres)