Loron espiritualidade ba FMA sira

Venilale – Ohin, 3 Outubru, mak loron daruak selebrasaun tinan 25 prezensa FMA nian iha Timór dedika ba FMA hotu prezente iha Timór. Loron ne’e sai okaziaun loron espiritualidade nian. FMA sira konsentra iha ETP Madre Mazzarello (Venilale) no hahú ho Eukaristia selebra husi padre Nelson Gonçalves SDB, dedika ba Na’i-Feto. Iha ninia omilia padre Nelson fahe ninia esperiénsia vokasionál ne’ebé hahú iha Oratóriu Dili FMA sira-nian, no konsidera nia an fuan ida husi FMA sira-nia pastorál no ba ne’e nia agradese FMA sira hodi haka’as an iha fidelidade iha ninia vokasaun.

Misa remata madre Piera, reprezentante Madre Jerál nian, hato’o ninia konferénsia ho tema “Hodi Maria nia matadalan ita deskobre filafali grasa no beleza sai FMA”. Fundamentu bíbliku ba ita-nia serteza katak Maria mak gia ita ita hetan iha Evanjellu João nian. Ita-nia seguransa mak Jezús nia Liafuan rasik iha entrega iha krús: Nia fó buat hotu ona, hela de’it mak Ninia Inan no, atu iha Kreda bele moris ninia prezensa nia haraik ninia Inan “memória moris Jezús nian”, edukadora Kreda nian tuir ain-hakat evanjelizasaun foun nian.

Madre Piera foka ninia konferénsia iha identidade mariana FMA ida-idak nian. “Naran FMA: sínteze identidade ida nian”.

Figlie di Maria Ausiliatrice mak naran ne’ebé Don Bosco fó ba Institutu: «Imi pertense ba Família relijioza ida Na’i-Feto nian tomak. […] Imi-nia glória mak títulu furak Figlie di Maria Ausiliatrice no hanoin bá katak imi-nia Institutu tenke sai monumentu moris gratidaun Don Bosco nian ba Maromak nia Inan ne’ebé boot, ne’ebé ita invoka ho títulu Sarani sira nia Tulun».

Iha naran FMA bele hetan aspetu partikulár rua: “relasaun filiál membru sira-nian ho Maria no sira-nia misaun iha sosiedade no Kreda”, irmán Piera hateten. Don Bosco hakarak ita sai FMA, katak iha relasaun intimidade nian ho Maria, no nia konsekuénsia mak mai ita-nia identidade: Gratidaun ba Maria. Ema ne’ebé moris esperiénsia oan nian, rekoñese buat hotu nu’udar don, ‘agradesida” no ida-ne’e mak ita-nia espiritualidade Magnificat nain.

Konvite boot ba FMA sira mak hakle’an ba beibeik karakterístika mariana sira, asume sira no sai ilas Na’i-Feto nian, sai nia kópia ida, “memória moris Maria nian”, hodi saran an loroloron ba nia liman ne’ebé gia ita, akompaña ita atu sai hanesan nia tulun-na’in iha foin-sa’e sira nia leet, liuliu sira ne’ebé kiak liu.

Enkontru taka ho momentu marianu iha orasaun no FMA sira tuir tinan profisaun nian hafoun sira-nia kompromisu atu sai Maria Ausiliadora nia oan-feto sira, ema “mariana” ba beibeik. Iha okaziaun ne’e komunidade ida-idak simu plaka ida ho Don Bosco nia liafuan: “Na’i-Feto pasiar iha uma ne’e no taka nia ho nia mantu” (Cronistoria V, 52).