Baucau – Dioseze Baucau ne’ebé harii iha 30 Novembru 1996 halo ona tinan 21, ninia bispu dahuluk no atuál mak D. Basílio do Nascimento, konsagra iha 6 Janeiru 1997, no tama iha dioseze Baucau iha loron 19 Marsu 1997, tanba dioseze Baucau nia padroeiru mak S. José, Na’i-Feto Maria nia kaben.

Bainhira Amu-Papa S. João Paulo II harii Kreda Dioseze Baucau nia hakarak uluknanai atu hakmaan Bispu Dioseze Dili nia serbisu, atu asiste di’ak liután sarani sira nia moris, fó biban atu haboot sarani sira nia fiar iha Maromak. Ida-ne’e mak sai sasukat ba asaun dioseze nian no mós sasukat ba avaliasaun.

Tinan-tinan diosezanu sira husi distritu haat halibur hamutuk iha Baucau atu selebra festa padroeiru.  Selebra festa padroeiru nian, husu atu ita avalia se buat ne’ebé Amu-Papa husu bainhira harii dioseze, to’o duni ka lae. Nune’e, Amu-Bispu Baucau nian, D. Basílio do nascimento husu atu hahú husi kúria no konsellu presbiterál, amlulik sira, relijiozu/a sira, katekista sira, ajente pastorál sira, movimentu no asosiasaun sira atu haree oinsá ita kolabora ho Maromak atu habelar ninia Reinu no habiit sarani sira-nia fiar. Nia husu atu tinan ida-ne’e ba oin, “haree liután ba formasaun sarani sira nian, formasaun katólika”. Nia hateten katak, “Sarani barak, dehan sira sarani maibé la hatene doutrina”.

Ita husu atu S. José, Mahein Salvadór nian no Espozu Maria Virjen nian bele harohan daet mai ita. Nia ne’ebé sai Aman no Edukadór Jezús nian, bele tulun ajente pastorál hotu, hahú husi Aman-Inan sira, katekista sira atu forma iha oan sira no katekúmenu sira Jezús nia ilas.