Dili – Loron 17- 03-2018, sábadu, tuku 09.00,OTL  too remata , iha  Eskola Maria Auxiliadora, halao retiru prepara-an ba festa Pascoa, retiru ida ne’e partisipa husi membru komunidade Edukativa eskola Maria Auxiliadora nian, professores, inan aman, trabalhadores, inklui mos madre sira, partisipante sira hamutuk 50 pessoas. Pregador ba retiru tinan ida ne’e mak Padre Agostinho Soares, SDB. Tema ne’ebé Padre aprezenta mak hanesan ami hakerek tiha ona iha leten “ Kuarezma: Tempu atu hadi’a domin ba Maromak, ba maluk no ba ita-an. Iha pontus balun ne’ebé ami sita husi ninia aprezentasaun ne’e mak: Sentidu  Kuarezma, bele haree iha sentidu Simbóliku, ne’e mak loron 40, ne’ebé husu ita atu renova ita nia moris nu’udar sarani, ( halo Karidade, Orasaun no Penitensia), renova ita nia domin ba Maromak liu husi relasaun ho Maromak, orasaun loron-loron, iha familia buka atu reza hamutuk, buka atu halo reflesaun ba –an rasik presiza hakmatek no reflesaun ida ne’e tenke lori mudansa ba moris, liu husi mos ita nia moris sakramental, missa no konfesa. Ba maluk sira, renovasaun domin molok ba ema seluk uluknanain mak renova uluk iha uma laran, buka atu halibur nu’udar familia, koalia ba malu, fahe esperiensia, tulun malu, eduka oan sira tuir valor sarani.

Iha parte seluk padre dezafia mos mestre  sira atu sai edukador/a ne’ebé professional, liu-liu iha tempu ( pontualidade), prepara didiak lisaun, preferensia iha sala laran ou ho notas sira,  hatutan mos katak labarik sira tenke sente eskola nu’udar fati atu haburas demokrasia, fo tempu atu rona labarik sira koalia, husu perguntas. Mestre/a ne’ebé professional mak ida ne’ebé hatene motiva labarik sira atu estuda, hatene fo liberdade ba labarik sira no lakuda attitude anti dialogo. Domin ba –an rasik mak bele hare ita nia aprezentasaun, hatais, hahan ne’ebé saudavel, ita nia maneira moris, exercíco fisico no kontrola saude jeral.

Molok atu remata Padre propoin buat tolu ba Membru Komunidade Edukativa sira : “ Sarani diak iha responsabilidade moral atu hetan nia santidade, hatene hatudu domin ba knaar no haree profisaun nu’udar vokasaun atu bele hetan santidade”.

Depois de aprezentasaun husi Padre, kontinua kedas ho konfesoens ba mestre/a no aman inan sira, no tuir kedas ho selebrasaun Eukaristia, iha selebrasaun Eukaristia, iha Padre nia omilia nia fo reflesaun badak deit, Pontus fundamental ne’ebé nia koalia kona ba Fiar relasiona ho evanjellu loron nian, nune’e Padre propoin deit, sarani presiza iha fiar ne’ebé klean, ne’e mak nu’udar fundamentu, uluknanain  ita nia relasaun ho Maromak. Ita buka atu deskobre no lee Maromak nia intervensaun iha ita nia moris liu husi akontesimentu baibain, haree ho matan fiar nian, husi ne’e ita nia fiar sai metin liu tan no ho meiu ida ne’e mak haboot liu tan ita nia fiar, hodi ita bele deskobre Maromak nia laran luak no domin.

(Maria Sarmento Guterres)