Venilale – Iha tempu Kuarezma, komunidade edukativa S. Maria Mazzarello, Venilale, halo atividade oioin atu haburas relasaun kle’an liután ho Maromak no solidariedade ho maluk kiak sira. Atividade sira ne’ebé hala’o mak ai-riin tolu kuarezma rasik nian: jejún, karidade no orasaun. Membru komunidade hotu hetan estímulu atu halo jejún no husi jejún ne’e bele fó apoiu materiál ba maluk kiak sira ho asaun solidariedade nian. Kona-ba haburas relasaun ho Maromak, komunidade edukativa buka atu haburas domin ba Eukaristia no Maromak nia Liafuan. Atividade sira ba ida-ne’e mak kontinuasaun formasaun ba liturjia eukarístika, partisipa iha Santa Missa ho di’ak, adorasaun ba Santíssimu Sakramentu semana ida dala ida no halo “lectio divina”.

Atividade “lectio Divina” hala’o iha 17 Marsu, no nia objetivu mak aprende oinsá harohan ho Maromak nia Liafuan. Lectio Divina katak, métodu ida orasaun nian hodi lee, reflete, fahe no harohan ho  Maromak nia Liafuan atu to’o ba relasaun ida kle’an no  íntimu ho Maromak. Estudante, profesór/a no Irmán sira hamutuk, depoizde input ida kona-ba métodu “lectio Divina” aprezenta husi Ir Yasintha Hoar, ida-idak ba iha grupu asosiasaun nian atu aplika métodu ida-ne’e.

Iha grupu mak sira aplika pasu sira lectio nian hanesan invokasaun Espíritu Santu hodi husik nia tama iha ita atu halo ita loke an ba Maromak nia Liafuan, lectio ka leitura Liafuan nian, meditatio, oratio, colatio ka partilla no actio ka foti asaun konkreta tuir buat ne’ebé Maromak husu mai ita. Pasajen ne’ebé sira reflete mak Mateus 24, 4-12, hodi tuir Amu-Papa Francisco nia mensajen ba tempu Kuarezma: “Tanba hahalok aat sira sei sai wain liután, ema barak nia domin sei namlaek”. Hodi komenta pasajen ne’e, Amu-Papa bolu ita atu matan-moris no keta rona ba “profeta falsu” sira nia lian ne’ebé buka lohi foin-sa’e sira ho droga, ho osan eh sasán ne’ebé hetan ho dalan aat, ho relasaun lais bazeia ba prazér de’it, nst. Kona-ba “domin ne’ebé malirin”, Amu-Papa fó ezemplu sira hanesan  “hanoin an no baruk espirituál, pesimizmu ne’ebé la fó fuan, tentasaun halo an sentru moris nian, istori malu beibeik, no mentalidade mundu nian nebe halo ita hanoin de’it kona-ba buat ne’ebé bele hare nune’e hamenus ita nia laran-manas misionáriu”.

Esperiénsia ohin, tulun partisipante lectio divina nian, liuliu estudante ETV Madre Mazzarello atu husik Maromak nia Liafuan leno ita-nia hahalok sira, katak, nu’udar lalenok ba dixernimentu, hodi la monu ba babeur sira ne’ebé halo ita-nia fuan sai aat, eh mate tanba la “hadomi”.