Husi irmán Alexandrina

 

Dili –    Iha loron 1 Outubru lokraik, Madre Piera Cavaglià halo vizita badak iha komunidade S. João Bosco Balide, ho razaun atu simu Aspirante na’in haat ne’ebé ohin dala ida tan Maromak hatudu nia domin hodi bolu sira atu tuir Nia iha dalan Don Bosco no Madre Mazzarello nian iha etapa Postulantadu.

Ita hotu hatene katak Konselleira ida ida nia vizita nafatin lori Maromak nia grasa no bensaun. Nune’e ho fuan nakonu ho ksolok ami hein hodi simu Madre ho dansa no knananuk benvinda,hafoin kontinua kedas ho selebrasaun postulante sira nian.

“Uluknanain ha’u hahi’i no agradese Maromak ba imi foin-sa’e sira  no ha’u  agradese Na’i tan bolu imi ida-idak ho imi nia naran rasik”, madre Piera hateten. “Konserteza imi halo sakrifísiu barak atu tuir Jezús, husik família hodi troka estilu moris nian, no oinsá atu haboot domin ba Maromak. Maromak bolu imi atu tuir Jezús no lori Jezús ba foin-sa’e sira iha dalan ne’ebé nakonu ho grasa no bensaun. Jezús nafatin ho imi wainhira imi iha krús, Jezús rasik hamamuk Nia-an tan domin ba Aman no ba imi ida-idak. Jezús hadomi imi tanba ne’e Jezús hakarak forma imi tuir Ninia domin, keta ta’uk kona-ba krús no difikuldade ne’ebé imi sei hetan. Maibé serteza katak  Jezús bolu, Nia sei nafatin hamutuk ho imi, hanesan Madre Mazzarello nia hanorin ne’ebé dehan buka moris nafatin iha Maromak nia prezensa”, nia kontinua.

Hodi foti ezemplu Maria nian ne’ebé nafatin hamutuk ho nia oan sira no nia belun, ni akonvida atu iha konfiansa ba Maria, ita-nia Inan. “Iha salmu,  salmista haktuir ha’u klmar hetan dame  hanesan kosok-oan ida iha inan nia liman, nune’e mós nia hakarak imi sai nu’udar nia oan. Iha dalan formasaun tenke fó-an ba Maromak no ba nia Oan Jezús no hateke ba Maria hanesan imi nia inan. Nia sei tulun imi atu sai tulun nain ba foinsa’e sira, nune’e husu Jezús atu reza ba imi ida-idak”.

Depoizde selebrasaun, madre Piera Cavaglià hamutuk ho madre Felicidad, madre Paola no Irmán sira hotu ne’ebé tuir selebrasaun ne’e, ba vizita Mana Filomena (Mana-Be) nia rate. Too iha ne’ebá hamutuk ho familia reza no tau ai-funan ba rate no ba vizita nia fatin Madre husik hela imajen Laura Vicunã atu família kontinua reza ba nia santidade. Hafoin Madre sira fila ba komunidade no han hamutuk.

Iha Bonoite madre Piera husik hela nia mensajem hodi dehan katak “Maromak laran metin iha imi tanba entrega ba imi Jezús nia rikusoin nune’e husu mós ba imi atu tau matan ba rikusoin sira ne’e, la presiza prega barak maibé sasin moris nian, sasin ksolok nian mak folin boot liu. Mai ita kontinua kria klima Valdoco no Mornese, simu malu basá ita hotu mak don sira Maromak nian ne’ebe halibur ita hamutuk”. Atu taka nia konvida atu reza ba malu atu bele buras iha Maromak Nia domin.