Venilale – Loron Mundiál Feto nian monu iha 8 Marsu no Komunidade Edukativa Madre Mazzarello, Venilale iha oportunidade atu hetan formasaun husi NGO “Ba Futuru” ne’ebé aprezenta kona-ba feto no mane nia serbisu hamutuk no hahán saudavel. Ba ita-nia informasaun “Ba Futuru” nia misaun mak proteje labarik sira, redús violénsia, habit feto sira no inspira foin-sa’e estudante sira ho valór sira hanesan ‘empowerment’, responsabilidade, resiprosidade, haraik-an, respeitu, igualdade nst.

Staff “Ba Futuru” hahú hodi fó teste diagnóstiku ida kona-ba estudante sira nia koñesimentu kona-ba tópiku iha leten, hafoin sira halo dramatizasaun ida atu aprezenta kona-ba importánsia feto no mane deside hamutuk no dignidade hanesan no kona-ba hahán saudavel. Hotu tiha aprezentasaun dramatizada eh ho forma teatru nian, sira fó fila fali teste hanesan atu haree oinsá estudante sira kapta informasaun nee’bé sira fó.

Iha kalan fali, menina sira koléjiu nian, tuir grupu asosiasaun nian aprezenta kona-ba feto modelu ruma nia moris hanesan Cassie Bernall, Santa Mónica, Santa Bárbara, Santa Germana. Aleinde ne’e grupu rua aprezenta situasaun atuál feto sira-nian hanesan diskriminasaun ne’ebé oan-feto esperiénsia iha uma-laran rasik no esplorasaun seksuál.

Ikusmai, Ir Jacinta iha “buona notte” konvida atu feto-raan sira iha koléjiu ne’e tane aas sira nia moris, keta husik ema hanehan sira no kaer metin ba ideál atu iha autonomia iha moris. Buat ne’e hotu ita halo hodi forma an iha valór umanu no sarani sira, no hateke ba modelu feto maluk balun ne’ebé susesu iha moris, santu no santa no Na’i-Feto nian ne’ebé sai fitun di’ak mai ita feto sira.