Liturjia Domingu Dahaat Kuarezma nian garante ita katak Maromak oferese mai ita, ho forma totalmente gratuita no inkondisionál, moris rohan-laek.

Leitura dahuluk dehan mai ita katak, bainhira ema haketak an husi Maromak no hili dalan sira egoízmu no autosufisiénsia nian, nia harii futuru ida marka ho terus no mate. Maski nune’e, autór Livru Crónicas nian dehan, Maromak fó nafatin ba nia Povu posibilidade seluk atu hahú fali, atu halo fali dalan esperansa no moris foun nian.

Leitura daruak hanorin katak Maromak hadomi ema ho domin totál, inkondisionál, sukat-laek; domin ne’e mak foti ema husi ninia kondisaun finitude no frakeza nian no oferese ba nia mundu foun moris nakonu no ksolok nian  ne’ebé hein ita iha ita-nia ezisténsia nia rohan.

Iha Evanjellu, João fó hanoin mai ita katak Maromak hadomi ita to’o haruka nia Oan-Mane mesak atu haraik mai ita moris rohan-laek. Ita simu konvite atu hateke ba Jezús, atu aprende ho Nia lisaun domin totál nian, atu la’o ho Nia iha dalan entrega no don moris nian. Ne’e mak dalan salvasaun nian, moris nakonu no definitivu nian.

Download