Maromak haraik unidade, maibé ema sira tenke haka’as an atu moris tuir unidade

RV – Iha katekeze kuarta 25 Setembru nian, Papa Francisco reflete kona-ba karákter ida de’it (“uno”) Kreda nian. Ba ema halibur iha Prasa S. Pedro, Santu Padre destaka katak Kreda namkari iha mundu tomak, maibé nia hanesan ba hotu. No Kreda nia dalan atu konserva unidade ne’e mak ida haraik-an nian, laran-midar nian no laran-luak nian.

Francisco esplika katak unidade iha Kreda hetan iha fiar, esperansa, karidade, iha Sakramentu sira ne’ebé sai nu’udar “koluna boot sira” ne’ebé sustenta edifísiu boot  ida mesak Kreda nian.

 

“Iha-ne’ebé de’it mak ita bá, iha parókia ida mós, iha sikun dook ida mundu nian, ita hetan Kreda ida mesak; ita horik iha uma, ita família ida, ita horik entre maun-alin no biin-alin sira. Ida-ne’e mak don boot ida Maromak nian! Kreda ida de’it ba ema hotu”.

Nia resalta katak hanesan akontese iha família, iha Kreda mós akontese atu namkari iha mundu. Maibé ligasaun kle’an sira ne’ebé metin nafatin independente husi distánsia sira. Nu’udar ezemplu, nia sita JMJ Rio2013, ne’ebé revela klima kle’an unidade nian.

“Ita hotu husu ba ita-nia an rasik: ha’u, nu’udar katóliku, sente unidade ne’e? Ha’u nu’udar katóliku moris unidade Kreda nian? Eh ha’u laiha interese, tanba ha’u taka an iha ha’u-nia grupu ki’ik eh iha ha’u-nia an rasik. (…) Triste atu hetan Kreda ida privatizada tanba egoízmu no kuran iha fiar”, nia hateten.

Papa Francisco fó hanoin katak dalaruma mosu konflitu no divizaun sira ne’ebé hakanek Kreda, nune’e nia la hatudu oin loos. Konta aat ema mak buat ruma ne’ebé halo aat liu ba Kreda. Nia dehan katak, Maromak haraik unidade, maibé ema sira tenke haka’as an atu moris tuir.

“Presiza buka, harii komuñaun, eduka ita-nia an ba komuñaun, supera inkomprensaun no divizaun sira, hahú husi família, husi realidade ekleziál no diálogu ekuméniku. Ita-nia mundu presiza unidade (…) no Kreda mak Uma komuñaun nian”.

Santu Padre konklui hodi destaka katak Espíritu Santu mak motór unidade Kreda nian. “Tanba ne’e importante orasaun, nu’udar kbiit (klamar) ba ita-nia kompromisu sai mane no feto sira komuñaun nian. Orasaun ba Espíritu Santu, atu bele halo unidade Kreda nian to’o mai”.