Sidade Vaticano – Papa Francisco konvida joven sira atu partisipa iha serbisu sira preparasaun nian ba asembleia sínodu Bispu sira-nian dedika ba jerasaun foun sira, hodi bá iha pájina sira Vaticano kria iha rede sosiál sira.

“Ha’u hakarak tebes atu joven hotu bele sai protagonista preparasaun ne’e nian, tan ne’e sira bele intervein online, liuhusi grupu linguístiku sira ne’ebé joven sira seluk mak modera”, Nia hateten ne’e iha Prasa S. Pedro iha loron 18 Fevereiru.

Papa Francisco fó hanoin katak foin-sa’e 300 sei halibur iha Roma husi 19-24 Marsu, ba “reuniaun preparatória” ida Sínodu nian.

“Grupu sira nia kontributu iha rede sei tau hamutuk ho ida reuniaun Roma nian”. Amu-Papa konvida joven sira atu buka informasaun liután iha website Sekretária Sínodu Bispu sira-nian. “Ha’u agradese imi ba imi-nia kontributu atu ita la’o hamutuk”, nia dehan.

Sínodu ho tema “Joven sira, fiar no dixernimentu vokasionál” sei hala’o iha Outubru 2018. Maibé Amu-Papa hakarak loke servisu pré-sinodál iha 19 Marsu ho joven sira husi mundu tomak, fiar-na’in no lae.

Durante realizasaun pré-sinodál joven sira bele partisipa hodi haruka rezultadu reflesaun ba grupu linguístiku, liuhusi pájina www.synod2018.va eh https://www.facebook.com/synod2018.

Ita bele define sínodu nu’udar asembleia konsultiva ida husi reprezentante episkopadu katóliku sira mundu tomak nian, no hamutuk iha mós peritu no konvidadu sira seluk, ho knaar atu tulun Amu-Papa iha governu Igreja nian. To’o ohin loron iha asembleia ordinária 14 no estraordinária tolu, rua ikus dedika ba Família (2014 no 2015).