Venilale – Depoizde feriadu ba fulan rua, Oratóriu sira halo parte ba komunidade Madre Mazzarello hahú hikas fali, iha domingu dahuluk Kuarezma nian, 18 Fevereiru ne’e. Labarik sira halibur iha sentru, katak iha Uma Madre Mazzarello nian no hahú uluk ho orasaun iha Kapela ho lia-menon husi Ir Jacinta Gusmão, ne’ebé enkoraja sira atu sai ativa iha oratóriu, tanba sira hetan priviléjiu ida-ne’e: Na’i-Feto rasik mak inspira sira atu mai oratóriu, no sira tenke sai fali apóstolu ba sira-nia kolega ne’ebé la mai. “Haree de’it, Ir Jacinta dehan, imi-nia maluk barak halai ba haree futebol maibé imi fali hili parte ne’ebé di’ak liu”.

Hotu tiha orasaun, hahú kedas ho jogu sira ba labarik hotu. Jogu primeiru mak Kuiz kona-ba Don Bosco no labarik sira husi oratóriu Bado-Ho’o no Fatu-lia mak hetan prémiu. Jogu sira sleuk ne’ebé halo silmutáneu mak tata rebusadu iha jambua laran, dansa kadeira, tebe balaun, jogu berlinde. Labarik hotu ne’ebé manán hetan prezente ruma.

Ikusnian, labarik ho animadór no animadora sira husi oratóriu ida-idak halo aprezentasaun kanta no dansa. La haluha taka ho merenda ba hotu-hotu.

Maski iha loron ne’e akontese konflitu eh baku malu entre klube husi Kaihuru-Lale no Uai-Oli ne’ebé joga futebol ba Don Bosco Cup (ne’ebé seidauk remata de’it), oratorianu sira hakmatek no kontinua sira-nia aprezentasaun dansa sira. Agradese ba Maromak buat hotu la’o di’ak. Atu remata Ir Áurea Freitas konvida prezente hotu atu harohan Ave Maria hamutuk molok Irmán no animadór/a sira akompaña fali labarik bai ha sira-nia fatin.