“Ha’u Fiar” no “Orasaun universál”
Sidade Vaticano – Hodi fó kontinuidade ba siklu katekeze kona Missa, Papa Francisco reflete iha kuarta, 14 Fevereiru, kona-ba Ha’u Fiar no ‘Oração dos fiéis’.
Santo Padre destaka katak ema ida-idak bainhira ba Missa, iha direitu atu simu ho abundánsia Maromak nia Liafuan, lee didi’ak no esplika iha omilia. Maromak nia Liafuan fekit ema nia fuan no nakfilak nia, no tanba ne’e, hotu tiha omilia, fó tempu ida silénsiu nian ne’ebé permiti atu fini ne’ebé simu tama iha klamar , Amu-Papa esplika.
Depoizde silénsiu ida-ne’e, resposta pesoál integra iha profisaun fiar Igreja nian, espresa iha “Ha’u Fiar”, no tuir Papa Francisco nia esplikasaun, manifesta resposta komún ba buat ne’ebé rona husi Maromak nia Liafuan. Nia subliña katak iha ligasaun vitál entre rona no fiar, tanba fiar sai buras ho rona no lori ba Sakramentu.
Resposta ba Maromak nia Liafuan sei halo iha orasaun universál, hanaran mós “oração dos fiéis”. Papa Francisco esplika katak, ho amlulik ne’ebé gia, povu oferese ba Maromak orasaun sira ba ema hotu nia salvasaun. “No iha momentu orasaun universál depoizde “Ha’u Fiar”, mak momentu atu husu Na’i buat sira ne’ebé forte liu iha Missa, buat sira ne’ebé ita presiza, buat sira ne’ebé ita hakarak”, nia hateten.
Maibé Amu-Papa salienta: “Intensaun sira ne’ebé Amulik konvida atu povu sarani harohan tenke fó lian ba nesesidade konkreta sira komunidade ekleziál no mundu nian, hodi evita uza forma konvensionál no míope sira. Orasaun ‘universál’ ne’ebé konklui liturjia Liafuan nian, ezorta ita atu halo sai ita-nian Maromak nia hateken, ne’ebé tau matan baNinia oan sira hotu”.
