Venilale – Iha loron 10 Fevereiru 2018, estudante II anno Hotelaria no Alimentar Eskola Técnico Vokasionál Santa Maria Mazzarello Venilale, organiza festa ida nu’udar sira nia resposta ida ba material ne’ebé profesora (Me. Fabiola ) hanorin kona ba HKN (Hatene kona ba Negosiu). Ninia objetivu mak  oinsa alunus sira hatene organiza festa ruma. Nune’e ho inisiativa estudante sira ne’e organiza festa Domin nian (VALENTINE DAY), ne’ebé muda mai oin ho razaun tanba loron 14 Fevereiru ne’e monu iha Quarta Feira Cinzas. Marka mos prezensa husi alunus Sekundária Jerál (SMAN) Venilale, lolos konvida mos SMAK maibe sira la marka presenza.

Atividade simples ne’e hahu ho orsaaun ne’ebé diriji husi Amu Kapelaun ETP nian mak pe. Abrão Pinto SDB, hafoin liafuan badak Benvinda nian husi diretora da Eskola no hafoin kontinua ho formasaun. Madre Alexandrina ne’ebé ho disponibilidade atu fahe ho foinsa’e hirak ne’e kona ba “ DOMIN LOOS MAK SAIDA?”

Primeira parte kona ba oinsa mak mosu loron Valentine ne’e, no tuir mai esplika kona ba oinsa Maromak Nia domin boot ba ema, hodi haruka Nia Oan mane mesak mai iha mundu atu salva ema. No foti pasajen husi I Kor. 13

Domin ne’ebé Maromak hakarak mak :

• Domin ne’ebé fó ksolok ba ema seluk
• Domin la hatene fó sala ba ema seluk
• Domin loos fó liberdade ba ema
• Domin la fó fatin ba laran moras
• Domin respeita ema seluk
• Domin loos laos tanba persiza maibe tanba ó mak presente ida
• Domin loos la fó kondisaun
• Domin kompriende nafatin

Ba imi foinsa’e sira buka domin loos atu bele fó ksolok laos tanba isin nia hakarak maibe Maromak mak domin nain, Nia mak hun ba domin.

Parte ikus atividade/ halo ezersisiu ida atu sukat oinsa hau nia domin ba hau nia maluk sira, hodi fo valor sanulu kada perguntas ida, hafoin halo avaliasaun.  Depois de formasaun, atividade kontinua hodi fo tempu ba foinsa’e sira atu fahe kona ba saida mak domin ne’e iha sira nia moris. No fo mos tempu atu estudante sira hakat liu ba hare produtu ne’ebé sira prepara tuir ida-idak nia area hanesan Alimentar : prepara doze no Hotelaria bebidas oi-oin. Ikus liu taka ho divertimentu no fahe malu.

 

(Joaninha Mesquita -2⁰ Hotelaria)