Amu-Papa nia katekeze iha kuarta 18 Setembru 2013

Sidade Vaticano – Papa Francisco iha ninia Audiénsia Jerál kuarta ne’e konvida saran sira atu harohan ba dame iha nasaun sira ho konflitu. Nia halo apelu molok “Loron Internasionál Dame nian”, selebra iha 21 Setembru tinan-tinan. Tuirmai ne’e iha tradusaun Amu-Papa nia liafuan sira.

“Tinan-tinan, iha 21 Setembru, Nasoens Unidas selebra “Loron Internasionál Dame nian”, no Konsellu Mundiál Kreda sira-nian konvida ninia membru sira atu harohan iha loron ne’e ba dame. Ha’u konvida Katóliku sira iha mundu tomak atu hamutuk ho Sarani sira seluk atu kontinua husu Maromak ba prezente dame nian iha parte sira ita-nia planeta nian ho problema. Atu dame, Jezús nia prezente, moris nafatin iha ita-nia fuan sira no sai apoiu ba intensaun no asaun líder sira ita-nia planeta nian. Mai ita empeña an atu enkoraja esforsu hotu ba solusaun diplomátika no polítika iha pontu fokál hotu funu nian ne’ebé sei sai kauza ba preokupasaun sira. Ha’u nia hanoin ba liuliu povu doben Síria nian, iha-ne’ebé trajédia umana bele rezolve de’it liuhusi diálogu no negosiasaun, ho respeitu ba justisa no dignidade ema ida-idak nian, liuliu sira ne’ebé fraku liu no la bele defende an”.

Papa Francisco mós filafali ba tema Kreda nu’udar ita-nia Inan iha ninia katekze hodi destaka aspetu tolu ne’ebé hetan inspirasaun husi “ita-nia inan sira” nia hahalok.

Ida uluk, hanesan inan ne’ebé di’ak, Kreda hatudu mai ita lurón atu sai tasak iha moris. Nia la aprende husi livru sira, maibé husi fuan rasik. “Inan ida nia universidade mak nia fuan rasik. Iha ne’ebá nia aprende oinsá haboot oan sira, no ida-ne’e furak liu:, Frnacisco hateten.

Iha fatin daruak, Kreda mak komprensiva no laran-sadia hanesan inan ida ne’ebé akompaña ho pasiénsia oan sira, boot mós; no bainhira sira sala mós, nia hatene hetan maneira atu komprend eno tulun sira. “Ha’u hanoin ba inan sira ne’ebé terus ba oan sira iha kadeia eh iha situasaun difisil: sira la husu se oan sira sala eh lae, maibé kontinua hadomi sira; no dala barak, sira sofre umillasaun, maibé lahó ta’uk, sira la para atu saran an”. Kreda hanesan ne’e, nia la taka odamatan; la julga, maibé oferese Maromak nia perdaun, nafatin fó esperansa.

Ikusnian, ba oan sira nia di’ak, inan sira hatene tuku odamatan hotu, liuliu odamatan Maromak nia fuan nian. “Dala hira mak inan sira harohan ba oan sira, liuliu ba sira ne’ebé fraku liu, ba sira ne’ebé presiza liu, ba sira ne’ebé iha moris la’o tuir dalan perigozu eh salan! No sira la kole! Nia iha fuan boot. Imi tuku nafatin Maromak nia fuan nia odamatan ho orasaun”. Buat hanesan mak Kreda halo” nia tau iha Na’i nia liman, ho orasaun, situasaun hotu nia oan sira-nian. Ita konfia iha kbiit orasaun Kreda nian, ita-nia Inan doben. “Mai ita haree iha Kreda inan di’ak ida ne’ebé hatudu lurón ne’ebé ita tenke tuir iha moris, hatene iha pasiénsia, laran-sadia no komprensiva no tau it aiha Maromak nia liman”.