Sam Phran (Tailándia) – Husi loron 9 to’o 13 Fevereiru, Filhas de Maria Auxiliadora na’in 28, leigu no joven na’in 13 husi komunidade edukativa halibur iha Sam Phran (Tailándia) atu halo verifika tinan tolu nian depoizde Kapítulu Jerál XXII.

Loron dahuluk verifika nian hahú ho Selebrasaun eukarístika hodi halo memória ba Beata Eusebia Palomino,  prezide husi Pe. Francesco Cais SDB. Hafoin iha abertura, depoizde benvinda husiInspetora Tailándia nu’udar uma-na’in, iha mós benvinda husi Prezidente CIA (Konferénsia Inter-inspetoriál Ázia Orientál) , Ir Alma Castagna. Iha ninia liafuan benvinda nian nia esprime “ksolok no priviléjiu atu halibur hamutuk iha-ne’e”.  Komunidade no inspetoria mak hili  atu aprezenta dalan ne’ebé Inspetoria halo no mós atu buka dalan atu kontinua  atu iha “fuan manas atu lori Na’i nia prezensa iha-ne’ebé ita moris bá”. Ksolok no priviléjiu ida-ne’e tanba “iha loron hirak ne’e ita haksolok ho Madre [jerál] no konselleira sira iha ita-lee; ksolok atu rona Madre nia liafuan sira ne’ebé sei leno ita-nia reflesaun sira, no ita agradese nia tanba nia fó ninia disponibilidade kompleta”. Aleinde ne’e, Ir Alma hatutan “konselleira sira ne’ebé prezente iha-ne’e – Ir Runita Borja, Ir Maria Assunta, Ir Paola Battagliola – sei tulun ita atu haluan ita-nia orizonte sira, la taka an iha ita-nia País sira-nia limiti, ho hateken miope eskolante na’in rua Emaus nian”.

Loron ne’e Madre Jerál, Me. Yvonne Reungoat halo lectio divina kona-ba pasajen Emaus nian, ne’ebé sai íkone Institutu no CIAO nian. Me. Jerál iha ninia lectio indika atitude ruma atu kultiva nu’udar komunidade edukativa hanesan “rona, leno, fahe no fila fali” hanesan eskolante Emaus sira-nia esperiénsia ho Jezús. Hafoin nia mós husu atu “ita husik ita-nia an hetan akompañamentu”, “aseita atu muda an” no “sai akompañadór no akompañadora espirituál”.

Iha parte loraik, partisipante sira fahe ba grupu neen (3 ho lia-inglés no tolu ho lia-italianu) atu halo sínteze kona-na hilin tolu Institutu nian: “Nakflak an liuhusi enkontru, hamutuk ho foin-sa’e sira, sai misionária/u esperansa no ksolok nian”, no hafoin aprezenta ba asembleia. Ba loraik ne’e grupu sira haree de’it mak kondisaun no difikuldade sira atu hala’o hilin sira-ne’e.

Partisipante sira husi FMA Timor-Indonesia mak Ir Alma Castanga (inspetora), Ir Jacinta Gusmão, Ir Virgilia Marçal, Afonso Alves Soares no Jacob Zacarias.