Venilale – Peregrinasaun Maria Ausiliadora Pergrina kontinua vizita uma sira. Hafoin hotu tiha vizita komunidade Maria Mazzarello Venilale, iha loron 15 Setembru, domingu maibé mós loron komemorasaun Inan Terus-Na’in nian, nia hakat tun ba uma dahuluk FMA sira-nian, katak komunidade Maria Asiliadora.

 

Iha ne’ebé Maria bá, nafatin halibur nia oan sira hotu, nune’e mak akontese mós iha Venilale. Husi Viqueque mós mai buka nia.

Maria nia prezensa iha Uma Dahuluk FMA nu’udar selebrasaun tinan 25 prezensa FMA nian iha Timor-Leste. FMA sira to’o iha Venilale iha loron 2 Outubru 1988.

Selebrasaun tinan 25 FMA Nia prezensa sei hala’o iha Venilae iha loron 2 Outubru ho Povu Venilale, loron 5 Outubru ho Família Saleziana no loron 6 Outubru ho Juventude. Selebrasaun ho FMA Nia família sira sei hala’o iha loron 7 Dezembru 2013 iha Dili, ho inaugurasaun FMA Nia uma foun.