Dili – Loro 5 Fevereiru 2017, loron ne’e sai  loron espesiál liu ba ami Filhas de Maria Auxiliadora iha Dili tanba dadersaan de’it Reitór-Mor Don Ángel Fernández Artime sdb, selebra Eukaristia hamutuk ho nia oan Feto sira iha uma Novisiadu FMA Comoro.

Reitór-Mor apresia e agradese ba prezensa Irmán  FMA sira nian ne’ebé hatudu simplisidade no fiel iha selebraasaun sira iha tempu ninia vizita semana ne’e nia laran.

Maromak Nia futar Lia ne’ebé kona makaas ita iha dadeer kmanek ida ne’e mak  Jezús nia paixaun ba ema sira ne’ebé tuir no mós hasoru  Nia. Lia menon ne’ebé nia salenta makaas liu mak:  ita nia serbisu sira bainhira ita halo, buka  atu ema haree  de’it ida  ne’e laloos, maibé buat ne’ebé ita halo ho domin liu –liu ba hirak ne’ebé Nai entrega mai ita, halo ho domin ida ne’e mak folin boot liu.

Reitór-Mor mós fahe esperiénsia ruma ne’ebé kona liu nia moris, liu husi Misionáriu na’in 2 ho jestu ne’ebé halo diferensa ne’ebé sai lisaun ida mai ita kona ba “Domin”.

Misionáriu katuas ida ne’ebé nia hetan iha rai misaun bainhira nia halo vizita. Misionáriu ida -ne’e nia hadomi liu povu kiak sira, hela hamutuk no halo di’ak barak ba sira i povu hotu hadomi  liu misionáriu ne’e,  ida jestu konkretu domin ne’ebé loos.

Iha fatin seluk nia mós hasoru Misionáriu ida ne’ebé halo di’ak barak ba povu, maibé nia lahadomi povu. Misionáriu ne’e hatudu de’it obra boot sira nia halo maibé povu rasik lasente nia domin loloos, tanba sasán mak sai importante liu duké ema, ida ne’e hatudu katak domin laloos.

Nune’e ba formande sira, aprende atu hadomi ita nia povu sira. Dalan pobreza nian soi ita ba dalan Santidade nian.

Reitór-Mor konvida FMA ida –idak konxiente nafatin katak serbisu hotu ne’ebé ita halo laiha domin laiha mós Maromak, tan ne’e serbisu hotu ne’ebé ita halo ba maun alin sira halo ho domin, ida nee mak Maromak hakarak.

Tuir mai nia mós ba vizita fatin produsaun sira mak hanesan:  Cafetaria, Kostura e produsaun paun no dosi.

Nia apresia tebes ba obra sira ne’ebé ita oferese ba foin-sa’e sira. Atividade hirak ne’e mak meiu ida ne’ebé FMA oferese, maibé formasaun ba moris nu’udar sarani  ne’ebé sira simu  husi Irmán sira iha fatin ida ne’e presiza  tebes atu valoriza  iha moris, liuliu sai ema responsavel no autónomu iha moris aban bairua nian.

(Ines Bartolo Freitas)