RV – Papa Francisco iha Angelus, hodi refere ba Evanjellu Marcos nian salienta relasaun entre Jezús nia milagre sira no fiar ne’ebé mosu. Nia subliña katak “kura isin nian iha finalidade ba kura fuan nian”. Livre tiha husi korente sira aat nian no manán tiha kbiit liuhusi Jezús nia intervensaun, Papa Francisco afirma katak “presiza tau an ba serví Na’i”. Jezús la mai atu lori salvasaun iha laboratóriu ida; la halo pregasaun iha laboratóriu, hadook an husi ema sira: “Nia iha ema lubun boot sira nia leet! Iha pvou nia leet”. No anúnsiu Maromak nia Reinu nian husi Jezús nia parte – Amu-Papa esplika – “hetan ninia fatin iha lurón”. Tuir nia, “lurón mak fatin atu haklaken ksolok Evanjellu nian” – nia observa – “no tau Kreda nia misaun iha sinál la’o ninia okos”, movimentu nian no la’ós estátiku.

Iha Angelus depoizde orasaun Mariana, Amu-Papa anunsia Loron Orasaun no Jejún ba dame iha 23 Fevereiru.

Papa Francisco hateten katak iha loron orasaun no jejún monu iha 23 Fevereiru, “ita sei oferese ba populasaun Repúblika Demokrátika Congo nian no Sul Sudão”.

Depoizde orasaun Mariana Angelu nian, hodi hanoin trajédia sira mai husi situasaun konflitu nian iha parte oioin mundu nian, Amu-Papa husu atu ema hotu sarani eh lae, fiar-na’in eh lae, atu adere ba “Loron orasaun espesiál orasaun no jejún nian ba dame”, iha sesta semana dahuluk kuarezma nian, 23 Fevereiru.

Nia hato’o apelu forte ba dame: “Ita-nia Aman Lalehan, rona nafatin ninia oan sira ne’ebé hakilar ba Nia iha terus no laran-susar, fó dia’k ba fuan kanek sira no kura sira-nia kanek”.

Nia dirije apelu forte atu ita rona hakilar ne’e, no ema ida-idak iha ninia konxiénsia rasik, iha Maromak nia oin, husu ba nia an: “Saida mak ha’u bele halo ba dame? Seguramente ita bele harohan, maibé la’ós de’it ne’e: ida-idak bele konkretamente dehan “lae” ba violénsia bainhira depende ba nia. Tanba vitória ne’ebé hetan liuhusi violénsia mak vitória ne’ebé falsa; enkuantu serbisu ba dame halo di’ak ba ema hotu!”, Nia hateten.

Papa Francisco mós hatudu ninia prosimidade ba povu Madagascar ne’ebé sofre kalamidade forte, ho vítima wain, lakon uma no estragu wain.