Preparasaun ba jubileu 25 FMA nia prezensa no DB nia bisentenáriu moris nian

Dili – Salezianu sira vizitadoria S. Calisto Caravario ITM (Indonesia-Timor) no saleziana sira provínsia S. Maria D. Mazzarello TIN (Timor-Indonesia) hala’o enkontru iha kuarta dadeer, iha uma provinsiál SDB, Comoro. Asuntu ne’ebé trata mak selebrasaun tinan 25 FMA nia prezensa iha Timor-Leste, Don Bosco nia bisentenáriu moris nian no preparasaun materiál ba Katekeze ne’ebé Konferénsia Episkopál Timor-Leste husu ba Konferénsia relijiozu/a sira-nian.

Hotu tiha orasaun ba dame iha rai Síria, Irmán Paola Battagliola hahú hodi introdús selebrasaun tinan 25 prezensa FMA iha Timor-Leste. Tema festa jubileu ne’e nian mak “Maria mak halo buat hotu”. Tuir Ir. Paola, “ida-ne’e mak oportunidade  atu haburas kolaborasaun hodi habelar karizma salezianu. Selebrasaun tinan 25 atu agradese Maria Ausiliadora ba buat kmanek hotu ne’ebé nia halo hodi loke dalan ba nia oan-feto sira mai rai ne’e atu kompleta Família Saleziana iha Timór. Simu tiha prezente, oras ne’e tempu mós ba FMA Timor-Indonesia atu fahe hodi haruka ba mundu misionária FMA na’in rua. Irmán Olga, prezidente komisaun selebrasaun nian, aprezenta dalan ne’ebé hala’o iha tinan tolu ne’e nia laran hodi hakle’an dimensaun mariana: Maria nu’udar Inan, matadalan, edukadora no Maria ne’ebé halo buat hotu. Festa sei hala’o iha loron tolu: 2 Outubru FMA ho Povu Venilale; 5 Outubru: festa ho Família Saleziana; 5 kalan no 6 Outubru: festa ho joven sira. Festa ho FMA sira nia Família sei hala’o iha loron 7 Dezembru 2013.

Padre João Paulino iha oportunidade ne’e lee Reitór-Mor nia surat ho data 16 Agostu 2012 kona-ba Selebrasaun Bisentenáriu Don Bosco nia moris. Iha surat ne’e aprezenta kalendáriu mundiál selebrasaun tutun ne’ebé sei hahú iha tinan oin 15 Agostu 2014 no remata 16 Agostu 2015. Nia tema mak: Don Bosco nia misaun ho foin-sa’e no ba foin-sa’e sira. Vizitadoria SDB ITM mós prepara kalendáriu lokál hodi halo dalan ho Kongregasaun Saleziana tomak hanesan tuirmai:

• 16 Agostu 2014 – Abertura Bisentenáriu iha Koléjiu Fatumaka
• 19-23 Novembru 2014 – Kongresu istóriku kona-ba prezensa saleziana no ninia impaktu ba sosiedade Timór.
• 19-21 Marsu 2015 – Kongresu pedagójiku nasionál kona-ba pedgojia saleziana iha foin-sa’e timorense nia moris no sosiedade.
• 21-25 Maiu 2015 – Enkontru Família Saleziana (Delegadu Família Saleziana).
• 6-9 Agostu 2015 – Kongresu Maria Auxilum Christianorum iha Fatumaka (FMA, ADMA no Auxilium).
• 11-16 Agostu 2015 – Don Bosco Camp iha Dili (Pastorál Juveníl no MJS).
• 16 Agostu 2015 – Konkluzaun Bisentenáriu iha Dili.

Enkontru hotu ho informasaun kona-ba pedidu husi Konferénsia Episkopál TL kona-ba preparasaun materiál katekeze nian ba labarik to’o adultu sira. Konferénsia relijiozu/a sira nomeia ona ema na’in lima ne’ebé sei hala’o knaar ida-ne’e no husi FMA sira irmán Alma mak sei kolabora.

Enkontru taka ho snack hamutuk.