Sá loos sentidu sofrimentu no terus ne’ebé akompaña ema nia dalan iha rai? Sá loos Maromak nia “pozisaun” hasoru drama sira ne’ebé marka ita-nia ezisténsia? Liturjia Domingu V Tempu Komún nian reflete kona-ba kestaun fundamentál sira-ne’e. Maromak nia projetu ba ema la’ós projetu ida mate nian, maibé projetu moris loos nian, ksolok rohan-laek.

Iha leitura dahuluk, fiar-na’in ida naran Job komenta, ho laran-susar no deziluzaun, faktu kona-ba nia moris ne’ebé marka ho terus boot no sente Maromak dook no indiferente ba dezesperu ninia ezisténsia nian… Maski nune’e, Job dirije ba Maromak, basá nia hatene katak Maromak de’it mak ninia esperansa no lahó Nia la iha posibiidade salvasaun nian.

Iha Evanjellu hatudu Maromak nia preokupasaun ba nia oan sira nia ksolok. Iha Jezús nia asaun libertadora ba ema sira, hahú hatudu mundu foun lahó sofrimentu, lahó opresaun, lahó ezkluzaun ne’ebé Maromak mehi ba ema sira. Testu sujere tan katak, Jezús nia asaun tenke kontinua liuhusi ninia dixípulu sira.

Leitura daruak subliña liuliu, obrigasaun ne’ebé Jezús nia dixípulu sira asume, katak, fó sasin iha ema hotu nia oin, Jezús nia proposta libertadora. Iha sira-nia hahalok no sasin, Jezús nia dixípulu sira labele husik interese pesoál mak gia sira, maibé domin ba Maromak, ba Evanjellu no ba maun-alin sira.

Download