Papa Francisco iha audiénsia jerál

 

Sidade Vaticano – Iha dadeer kuarta ohin, Papa Francisco hahú fali katekeze kona-ba Kreda iha Tinan Fiar nian ne’e durante audiénsia jerál. Nia hahú hodi dehan katak imajen ida Konsíliu Vaticano II hili atu komprende di’ak Kreda nia natureza mak ida Inan nian: Igreja mak ita-nia Inan iha Fiar.

Ne’e mak ilas ne’ebé Kreda sékulu dahulu uza, no tuir Papa Francisco, di’ak ba ita mós. Nune’e, Amu-Papa hahú ho realidade maternidade nian no husu: “saida mak inan ida halo?”

 

“Uluknanai, ina ida hahoris moris. Nune’e mós Kreda, ne’ebé iha Batizmu hahoris Maromak nia oan sira, hahoris ita iha fiar.” Nia hanorin ita atu dehan “ha’u fiar:, tanba sarani ida la’ós nusa ida no la hahoris nia iha “laboratóriu” laran, basá fiar mak Maromak nia don ne’ebé haraik mai ita iha Kreda no liuhusi Kreda. No Kreda haraik mai ita moris iha Batizmu.

Iha momentu ida-ne’e mak Papa Francisco husu ba ema lubun boot, sarani hira mak hanoin kona-ba ni aloron Batizmu nian, basá data ida-ne’e mak “Kreda hahoris ita”. No nia fó knaar ida ba sarani sira atu bainhira fila ba u,a, buka hatene data Batizmu rasik nian, atu hanoin ho laran no halo festa.

Aleinde fó moris, inan mós habosu an sira, fó edukasaun ba sira no korrije sira. “Inan di’ak ida tulun oan sira atu sai husi an rasik, la hela ho kómodu iha inan nia liras nia okos, hanesan manu-oan sira iha manu-inan nia liras”.

“Kreda, nu’udar inan di’ak ida, halo hanesan: akompaña ita-nia krezimentu, hodi tranzmite Maromak nia Liafuan no administra sakramentu sira. Fó han  ita ho Eukaristia, oferese mai ita Maormak nia perdaun no fó konsolasaun ba ita iha momentu moras nian”.

Ikusnian, Papa Francisco fó hanoin katak, maski Kreda forma hsui  sarani sira, Nia mós hetan forma husi sira.  “Nia la’ós diferente husi ita rasik, maibé haree nu’udar totalidade fiar-na’in sira-nian: ha’u, ó, nia, ita mak parte Kreda nian. “Dala ruma –Papa Francisco hateten- , ha’u rona” ha’u fiar iha MAromak, maibé la fiar Kreda. Ha’u la fira iha padre ida-ne’ebá. Maibé Kreda la’os de’it padre sira.”

Ho forma ne’e, Papa Francisco reforsa ideia Kreda nian: it ahotu hanesan liuhusi Batizmu! Nune’e, se ema ida dehan katak nia fiar iha Maromak maibé la fiar iha Kreda… nia la fiar iha nia an rasik, tanba ita hotu mak Kreda.